Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 334 Hüküm no: 353 Orijinal metin no: [51a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed’in oğulları Hasan ve Mehmed’e nafaka takdiri Nafaka-i sagīrân Mahmiye-i İslâmbol’da Mirâhor mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-vesîka Emine bt. Mehmed nâm hatun meclis-i şer‘-i şerîf-i enverde zevc-i mutallıkı İbrahim Beşe b. Hasan nâm kimesne mahzarında takrîr-i kelâm ve bast-ı merâm edip zevc-i mutallıkım mezbûrun firâşından hâsılân ve benden mütevellidân ve hâlâ bi-hakkı’l-hıdâne hacr u terbiyemde olan sadrî oğullarım Hasan ve Mehmed nâm sagīrânın mâlları olmayıp nafaka ve kisveye ihtiyâcları olmağla sagīrân-ı mezbûrânın nafaka ve kisve-bahâları içün babaları mezbûr İbrahim Beşe üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīrân-ı mezbûrânın nafaka ve kisve-bahâları içün babaları mezbûr İbrahim Beşe üzerine bi’t-terâzî târih-i kitâbdan küllü yevm her birine onar akçeden cem‘an yirmi akçe farz ve takdîr edip meblağ-ı mefrûz-ı mezkûru sagīrân-ı mezbûrânın nafaka ve kisvelerine harc u sarfa ve lede’l-iktizâ istidâneye ve inde’z-zafer babaları mezbûr İbrahim Beşe üzerine rücû‘a mezbûre Emine Hatun’a izin vermeğin mâ-vaka‘a bi’t-taleb. Fî 15 R sene 1197 Şühûdü’l-hâl: Molla Ali b. Halil, Salih b. Halil, Mustafa b. Mustafa ve gayruhum.