Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 335 Hüküm no: 354 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Macunî Kasım mahallesinden Hafız Ahmed Efendi’nin yanmış olan berber dükkânı arsasını Ayşe Hatun’a satması Berber dükkânı arsası mübâya‘ası Mahmiye-i İslâmbol’da Ma‘cûnîkasım mahallesinde sâkin Hafız Ahmed Efendi b. Hüseyin Efendi meclis-i şer‘-i şerîf-i enverde işbu bâ‘isetü’l-vesîka Âişe Hatun bt. Abdülkerim Efendi’nin li-ebeveyn er karındaşı ve tarafından vech-i âtî üzere tasdîka vekîl olduğu ber-nehc-i şer‘î [sâbit] olan Ebûbekir Efendi mahzarında ikrâr-ı tam ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ iki tarafdan Müezzin Süleyman Efendi arsası ve bir tarafdan Süleyman Usta menzili ve bir tarafdan tarîk-i âm ile mahdûd mârrü’z-zikr Süleyman Efendi taraflarından taş duvarı müştemil terbî‘an otuz altı buçuk ve kadden dört zirâ‘ bir bâb mülk muhterik berber dükkânı arsası tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mezbûre Âişe Hatun’a yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz guruşu müvekkile-i mezbûre Âişe Hatun yedinden tamamen ahz ü kabz eyledim ba‘de’l-yevm arsa-i mahdûde-i mezkûre zikr olunan taş duvarıyla müvekkile-i mezbûre Âişe Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 16 R sene 1197 Şühûdü’l-hâl: İmâm Hüseyin Efendi b. İbrahim Efendi, Mustafa Efendi b. İbrahim, Ömer Efendi b. Mehmed, Mustafa b. Mehmed Emin, Diğer Mustafa b. Abdullah, Süleyman Dede b. Eyüb, Molla Ali b. Halil.