Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 336 Hüküm no: 356 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şerife Habibe Hatun’un küçük kızı Şerife Zeliha’nın vakıf menzilde olan yarı hissesinin ferağı İzn-i menzil Mahmiye-i İslâmbol’da İskender Ağa mahallesinde sâkine iken bundan akdem fevt olan Şerife Habibe Hatun [bt.] es-Seyyid Ali’nin sadriye sagīre kızı Şerife Zeliha’nın babası ve tesviye-i umûrunu rü’yete kıbel-i şer‘den mansûb vasîsi işbu bâ‘isü’l-kitâb es-Seyyid Osman b. es-Seyyid Salih nâm kimesne meclis-i şer‘-i hatîr-i lâzımü’t-tevkīrde bi’l-vesâye takrîr-i kelâm ve ifâde-i merâm edip galle ve tevliyeti mahmiye-i mezbûrede Ali Fakih Câmi‘-i şerîfinde imâm olanlara meşrûta ve zikr olunan Ali Fakih mahallesinde vâki‘ ma‘lûmü’l-hudûd ve’l-müştemilât bir bâb vakıf menzil müteveffât-ı mezbûrenin hayatında ile’l-vefât bi’l-icâreteyn taht-ı tasarrufunda olup ba‘de vefâtihâ menzil-i mezkûr vasîsi olduğum kızım sagīre-i mezbûre ile zevc-i âhardan mütevellid sadrî kebîr oğlu es-Seyyid Mehmed b. İbrahim nâm kimesneye bi’l-münâsafe intikāl-i âdî ile intikāl edip lâkin menzil-i mezkûr mürûr-ı eyyâm ile müşrif-i harâb ve mâil-i türâb olup hâsılı harcına vefâ etmemekle kızım sagīre-i mezbûrenin menzil-i mezkûrda olan nısf hissesi bedel-i misli ve bâ-ma‘rifet-i mütevellî âhara ferâğ ve kabz-ı bedel ve bedeli istirbâh olunmak sagīre-i mezbûre hakkında evlâ ve enfa‘ olduğuna binâen kıbel-i şer‘den bana izin verilmek bi’l-vesâye matlûbumdur dedikde hakīkat-i hâl vasîyy-i mezbûr es-Seyyid Osman’ın takrîr-i meşrûhu üzere olduğu zeyl-i sahîfede mektûbü’l-esâmî Müslimîn ihbârlarıyla lede’ş-şer‘i’l-enver zâhir olmağın sagīre-i mezbûrenin menzil-i mezkûrda olan hissesi bedel-i misli ile âhara ferâğa babası vasîyy-i mezbûr es-Seyyid Osman’a kıbel-i şer‘den izin verilmeğin mâ-vaka‘a bi’t-taleb ketb olundu. Fî 16 R sene 1197 Şühûdü’l-hâl: Mustafa Ağa b. eş-Şeyh Mehmed, Halil Beşe b. Salih, Veliyüddin b. Yusuf.