Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 337 Hüküm no: 357 Orijinal metin no: [51b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Mustafa’nın Kastamonu’nun Araç kazası İpsirdik köyünde bulunan tarlası ile içindeki eşya ve hayvanlarla beraber evini amcası Mehmed’e sattığı Anadolu’dan emlâk mübâya‘ası Vilâyet-i Anadolu’da Kastamonu sancağında Araç kazâsına tâbi‘ İpsirdik nâm karye ahâlisinden olup mahmiye-i İslâmbol’da Aksaray kurbünde İsmail Ağa mahallesinde sâkin Hafız Mustafa b. Abdullah meclis-i şer‘-i şerîf-i enverde yine karye-i mezbûre ahâlisinden li-ebeveyn ammisi işbu bâ‘isü’l-kitâb Mehmed b. Halil nâm kimesne mahzarında ikrâr ve takrîr-i kelâm edip yedimde mülküm olup karye-i mezbûrede vâki‘ ma‘lûmü’l-hudûd fevkānî iki ve bir anbar ve tahtında bir âhûru müştemil bir bâb mülk menzil ile derûnunda mevcûd dört re’s öküz ve üç re’s inek ve üç manda ve sekiz re’s dana ve on vukiyye evân-ı nühâsiye ve menzil-i mezkûr ittisâlinde kâin kezâlik ma‘lûmü’l-hudûd iki bâb samanhâne ve bir harman yerimi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile ammim mezbûr Mehmed’e altmış guruşa bey‘ ve temlik ve yine karye-i mezbûre hudûdu dâhilinde vâki‘ lede’l-ahâli ve’l-cîrân ma‘lûmü’l-hudûd Abdülbâki nâm kimesneden müfevvez on beş keyl tohum istî‘âb eder müstakıllen tasarrufumda olan bir kıt‘a tarla ve ittisâlinde kâin kezâlik on beş keyl tohum istî‘âb bir kıt‘a tarlanın altı sehm i‘tibârıyla birer sehmden iki sehmi Mustafa ve Halil’in ve iki sehmi müşterî-i mezbûr Mehmed’in ve iki sehmi dahi benim taht-ı tasarrufumuzda olmağın ben zikr olunan tarlalarımı dahi kırk guruş bedel mukābelesinde bâ-ma‘rifet-i sâhib-i arz ferâğ ve tefvîz ve her birini mahâllinde kabz ve zabta taslît eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semen-i merkūm altmış guruş ile bedel-i mezkûr kırk guruş ki cem‘an yüz guruşu ammim mezbûr Mehmed yedinden tamamen ahz ü kabz eyledim ba‘de’l-yevm emlâk-i mezkûre ammim mezbûr Mehmed’in mülk-i müşterâsı ve zikr olunan tarlalar dahi dâhil-i havza-i tasarrufu olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 17 R sene 1197 Şühûdü’l-hâl: Hüseyin b. Abdulkadir, Abdullah b. Mustafa, Süleyman b. Ali, Ali b. Halil, diğer Molla Ali b. Halil ve gayruhum.