Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 338 Hüküm no: 358 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohri sancağı İstavra kazası Volanit köyünden olup Üsküdar’da vefat eden İbrahim b. Ebubekir’in vârisi Mahmud b. Mehmed’in tereke ile alakalı Mehmed Emin Efendi aleyhine açtığı davadan bir miktar para karşılığında vazgeçtiği Tereke ahz ve ibrâ Vilâyet-i Rumeli’de Ohri sancağında İstavra kazâsına tâbi‘ Volanit nâm karye ahâlisinden olup medîne-i Üsküdar’da Hacce Hatun mahallesinde sâkin iken bundan akdem vefât eden el-Hâc İbrahim b. İbrahim b. Ebîbekir’in li-ebeveyn er karındaşı oğlu ve hasran vârisi idiğini lede’ş-şer‘i’l-enver zâhir olan Mahmud b. Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed Emin Efendi b. Yusuf mahzarında bi’l-verâse ikrâr ve takrîr-i kelâm edip mûrisim müteveffâ-yı mezbûrun hîn-i vefâtında yanında mevcûd nakid yüz guruş ile eşyâ-i memlûkesinden iki çuka biniş ve bir çuka cübbe ve bir köhne kaput ve bir zerdeva paçası kürk ve bir Kıbrısî basma kuşak ve bir Mardinî kuşak ve iki destâr ve üç yağlık ve iki yemeni ve bir vaşak kürk ve bir mercan tesbîh ve bir Şam bıçağı ve iki keremsûd entari ve bir nühâs matara ve bir nühâs mankāl ve iki Yanbolu kebesi ve iki yorgan ma‘a çarşaf ve iki çuka çakşır ve bir gaddâre ve bir sîmli meç ve bir hilâlî sâ‘at ve bir kahve ibriğine mûmâ-ileyh Mehmed Emin Efendi vâzı‘ü’l-yed olmuş idi deyü nakd-i mezbûr yüz guruş ile eşyâ-i muharrere-i mezkûreyi ben bu esnâda mûmâ-ileyh Mehmed Emin Efendi’den taleb ve da‘vâya tesaddî eylediğimde ol dahi nakd-i mezbûr yüz guruş ile eşyâ-i muharrere-i mezkûreye vaz‘-ı yedini ikrâr lâkin müteveffâ-yı mezbûr el-Hâc İbrahim hâl-i hayatında ve kemâl-i akl-ı sıhhatinde işbu târih-i kitâb senesi şehr-i Rebî‘ülevvelinin on sekizinci günü nakd-i mezbûr yüz guruşu bana hibe ve eşyâ-i muharrere-i mezkûreyi dahi yüz yirmi guruşa bey‘ ve temlik ve teslîm eylediğinde ben dahi ber-vech-i muharrer ittihâb ve iştirâ ve temellük ve tesellüm ve kabz ve kabûl etmemle bi-hakkın vaz‘-ı yed ederim deyü mazmûnu müsbet ve takrîr-i meşrûhuna mutâbık bir kıt‘a hüccet ve bir kıt‘a i‘lâm-ı şer‘î ibrâzıyla beni def‘ etmiş idi. El-hâletü hâzihî mûmâ-ileyh Mehmed Emin Efendi merhameten bi-tarîki’t-teberru‘ mâlından bana yüz elli guruş def‘ ve teslîm eyledikde ben dahi yedinden tamamen ahz ü kabz edip mûrisim müteveffâ-yı mezbûrun dâhil-i hüccet ve hâric ez-hüccet mecmû‘-ı terekesine ve hukūk-ı mîrâsa müte‘allika âmme-i de‘âvî ve kâffe-i mutâlebât ve eymân ve muhâsamâtdan mûmâ-ileyh Mehmed Emin Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî 13 R sene 1197 Şühûdü’l-hâl: Es-Seyyid Ahmed Ağa b. Hasan, el-Hâc Hasan Ağa b. Ahmed, Mustafa Ağa b. Ebîbekir, Veliyüddin b. Hüseyin, Hüseyin b. Ömer, diğer Hüseyin b. Mustafa, İsmail Beşe b. Ömer, Molla Ali b. Halil ve gayruhum.