Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 339 Hüküm no: 359 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Murad mahallesinden Ayşe bt. Hasan’ın bir kısım eşyasını damadı Mehmed Beşe’ye sattığı ve kocasına da mehrini hibe ettiği Eşyâsını dâmâdına mübâya‘a ve mehrini zevcine hibe Mahmiye-i İslâmbol’da Mevlevîhâne Yenikapısı dâhilinde Kâtib Murad mahallesinde sâkine Âişe bt. Hasan nâm hatun tarafından ber-vech-i âtî ikrâra vekîl olduğu zât-ı mezbûreyi ârifân mahalle-i mezbûre imâmı es-Seyyid Mustafa Efendi b. es-Seyyid Ahmed ve müezzin el-Hâc Hasan b. Mehmed nâm kimesneler şehâdetleriyle şer‘an sâbit olan es-Seyyid Veliyüddin b. Mustafa nâm kimesne meclis-i şer‘-i şerîf-i enverde müvekkile-i mezbûrenin dâmâdı işbu bâ‘isü’l-vesîka es-Seyyid Mehmed Beşe b. Osman nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Âişe Hatun eşyâ-i memlûkesinden bâ-defter-i müfredât otluk memlû dört yemeni yasdık ve üç minder ve dört yemeni yüz yasdığı ve üç şilte ve bir beledî döşek ve üç yemeni yorgan ve bir çuka ferâce ve Şam alacası iki entari ve iki bez gömlek ve on vakıyye evân-ı nühâsiyesini tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile dâmâdı mezbûr es-Seyyid Mehmed Beşe’ye otuz guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mutâlebesinden müvekkilem mezbûre Âişe Hatun ve dâmâdı mezbûr es-Seyyid Mehmed Beşe’nin zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm eşyâ-i muharrere-i mezkûre mezbûr es-Seyyid Mehmed Beşe’nin mülk-i müşterâsı ve hakk-ı sarfı olup müvekkilem mezbûre Âişe Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mukırr-ı vekîl-i mezbûr es-Seyyid Veliyüddin yine meclis-i şer‘de müvekkile-i mezbûrenin hâlâ zevci es-Seyyid Ali b. Hasan mahzarında takrîr-i kelâm edip müvekkilem mezbûre Âişe Hatun zevci mezbûr zimmetinde ma‘kūdun-aleyh olan on guruş mehr-i müeccelini hibetü’d-deyn mimmen aleyhi’d-deyn sahîhatün fehvâsınca zevci mezbûr es-Seyyid Ali’ye hibe ve temlik eylediğinde ol dahi meclis-i hibede bilâ-mâni‘ ittihâb ve temellük ve kabûl edip ol-vechile mehr-i mezkûr on guruşdan zevci mezbûr es-Seyyid Ali’nin zimmeti berî’e olmuşdur dedikde mâ-vaka‘a bi’t-taleb. Fî 18 min-şehri Rebî‘ülâhır sene 1197 Şühûdü’l-hâl: İmâm es-Seyyid Mustafa Efendi b. es-Seyyid Ahmed, Müezzin el-Hâc Hasan b. Mehmed, Mehmed Emin b. el-Hâc Hasan, el-Hâc Hüseyin b. Receb, Çukadâr Mehmed Ağa b. ( ), Nakkāş Ali Ağa b. ( ), Molla Ali b. Halil.