Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 340 Hüküm no: 360 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bayezid mahallesinden Eyüb Ağa’nın yevmi yirmi üç akçe olan esamisini Salih Ağa’ya ferağı Esâme kasr-ı yedi Mahmiye-i İslâmbol’da Arabacı Bâyezid mahallesinde sâkin el-Hâc Eyüb Ağa b. Ömer nâm kimesne meclis-i şer‘-i şerîf-i enverde işbu bâ‘isü’l-kitâb es-Seyyid Salih Ağa b. es-Seyyid Ahmed nâm kimesne mahzarında ikrâr ve takrîr-i kelâm edip benim Silahdâr ocağında yüz yirmi dördüncü bölükde Mustafa Hüseyin orta ismiyle mutasarrıf olduğum yevmî yirmi üç akçe esâmîmi bundan akdem hüsn-i rızâ ve ihtiyârımla mezbûr es-Seyyid Salih Ağa’ya ferâğ ve bi’l-külliye kasr-ı yed ve ibtidâ ta‘bîr olunur tezkiresini dahi yedine teslîm eylediğimde ol dahi bedel-i ferâğ olmak üzere bana mâlından teberru‘an iki yüz otuz guruş def‘ ü teslîm eyledikde ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr es-Seyyid Salih Ağa’nın zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezkûr iki yüz otuz guruşa müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a. Fî 22 R sene 1197 Şühûdü’l-hâl: Veliyüddin Ağa b. Osman, Ahmed Ağa b. Abdullah, Mehmed b. Ali, Ebûbekir b. İsmail, Molla Ali b. Halil.