Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 341 Hüküm no: 361 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beyceğiz Hoca Kasım mahallesinden Emine Hatun’un kocasına eşyasından bir kısmını satıp bir kısmını da hibe ettiği Eşyâ mübâya‘ası ma‘a hibe ve nefy-i mülk Mahmiye-i İslâmbol’da Beyceğiz Hoca Kasım mahallesinde sâkine Emine Hatun bt. Yağcı İbrahim tarafından husûs-ı âti’l-beyânı ikrâra vekîl olduğu zâtını ârifân mahalle-i mezbûre imâmı el-Hâc Mehmed Emin Efendi b. Hafız Hüseyin ve Bekçi İbrahim b. Yahya nâm kimesneler şehâdetleriyle şer‘an sâbit olan Koltukçu es-Seyyid Mehmed Ağa b. es-Seyyid Ömer nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin hâlâ zevci işbu bâ‘isü’l-vesîka Ali Beşe b. İbrahim nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Emine Hatun zevci mezbûr Ali Beşe zimmetinde mütekarrer ve ma‘kūdun-aleyh olan on guruş mehr-i müecceli ile yedinde mâlı olan sekiz buçuk miskāl bir çift altın bilezik ve bir sîm kuşağını târih-i kitâbdan iki ay mukaddem hibe-i sahîha-i şer‘iye ile zevci mezbûr Ali Beşe’ye hibe ve temlik ve teslîm eylediğinde ol dahi ber-vech-i muharrer târih-i mezbûrda ittihâb ve temellük ve tesellüm ve kabz ve kabûl eyledikden sonra eşyâ-i memlûkesinden bâ-defter-i müfredât iki minder ve iki yorgan ma‘a çârşeb ve bir döşek ve iki beylik ve bir âbdest leğeni ve iki sahan ve bir kazgan ve bir nühâs mankāl ve iki kahve ibriği ve bir sini ve bir kadayıf tepsisi ve bir tâbe ve bir şamdan ve dört köhne beledî yasdığını dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile yine târih-i mezbûrda zevci mezbûr Ali Beşe’ye yirmi beş guruşa bey‘ ve temlik ve vech-i lâyık üzere tesellüm eylediğimde ol dahi târih-i mezbûrda ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi beş guruş mutâlebesinden zevci mezbûr Ali Beşe’nin zimmetini ibrâ-i âmm-ı sahîh-i şer‘î ile ibrâ ve ıskāt eylediğinde ol dahi ibrâsını kabûl etmeğin ol-vechile mehr-i mezkûr on guruşdan târih-i mezbûrdan beri mezbûr Ali Beşe’nin zimmeti berî ve zikr olunan altın bilezik ve sîm kuşak mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Emine Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mukırr-ı vekîl-i mezbûr es-Seyyid Mehmed Ağa yine meclis-i şer‘de mezbûr Ali Beşe mahzarında bi’l-vekâle i‘âde-i kelâm edip müvekkilem mezbûre Emine Hatun zevci mezbûr Ali Beşe ile mahalle-i mezbûrede mâ‘an sâkinler oldukları menzil derûnunda mevcûde bisât-ı beyt ve evân-ı nühâsiye ve gayr-ı nühâsiye ve eşyâ-yı sâire mezbûr Ali Beşe’nin mâlı ve mülkü olup zevcesi müvekkilem mezbûre Emine Hatun’un kat‘a alâka ve medhali yokdur dedikde mâ-vaka‘a bi’t-taleb. Fî 19 min-Rebî‘ülâhir sene 1197 Şühûdü’l-hâl: el-Hâc Mehmed Emin Efendi b. Hafız Hüseyin, Koltukçu İsmail b. Abdullah, İbrahim Ağa b. ( ), Ebûbekir Beşe b. ( ), Hasan Beşe b. ( ), Ali Beşe b. ( ), Bekçi İbrahim b. Yahya ve gayruhum.