Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 342 Hüküm no: 362 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nişancı hamamcısı Mehmed Ağa’nın, Mustafa b. Mustafa’ya Avlonya’daki çiftliğin kendi hissesini satıp tarlalardaki hissesini de meccanen ferağ ettiği Emlâk mübâya‘ası Vilâyet-i Rumeli’de Avlonya sancağında Tepedelen kazâsı nâhiyesine tâbi‘ Kayse nâm karye ahâlisinden olup mahmiye-i İslâmbol’da Kumkapı dâhilinde Nişâncı hamamcısı Mehmed Ağa b. Hasan nâm kimesne tarafından husûs-ı âti’l-beyânı ikrâra vekîl olduğu Hamâmî Halil Efendi b. Mehmed ve Hüseyin Ağa b. Hasan şehâdetleriyle sâbit olan Hamâmî Ali Efendi b. Mehmed meclis-i şer‘-i şerîf-i enverde karye-i mezbûre ahâlisinden müvekkil-i mezbûrun li-ebeveyn er karındaşı oğlu işbu bâ‘isü’l-kitâb Mustafa b. Mustafa nâm kimesne mahzarında bi’l-vekâle ikrâr ve takrîr-i kelâm edip karye-i mezbûrede vâki‘ bir tarafdan câmi‘-i şerîf ve iki tarafdan câmi‘-i mezbûrun vakıf tarlası ve bir tarafdan tarîk-i âm ile mahdûd fevkānî üç bâb oda ve kenîf ve âbdesthâne ve tahtında bir mikdâr havlu ve eşcâr-ı müsmireli bağçeyi müştemil çiftlik ta‘bîr olunur bir bâb mülk menzil ve çiftlik-i mezbûra teba‘iyet ile yine karye-i mezbûre hudûdu dâhilinde vâki‘ lede’l-ahâli ve’l-cîrân ma‘lûmü’l-hudûd ve’l-kat‘ tarla ve Iskarapar kasabasında kâin ma‘lûmü’l-hudûd bir kıt‘a tarlaların üç sehm i‘tibârıyla bir sehmi müvekkilim mezbûrun âhar li-ebeveyn karındaşı Hüseyin Ağa’nın ve bir sehmi müşterî-i mezbûrun ve bir sehmi dahi müvekkilim mezbûrun yedlerinde mülk ve taht-ı tasarruflarında olmağın müvekkilim mezbûr Mehmed Ağa çiftlik ta‘bîr olunur menzilden ber-vech-i muharrer mâlik olduğu bir sehm hisse-i şâyi‘asını tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mustafa’ya elli guruşa bey‘ ve temlik ve tarla-yı mezkûrlardan dahi kezâlik mutasarrıf olduğu bir sehm hissesini bâ-ma‘rifet-i sâhib-i arz meccânen ferâğ ve tefvîz ve her birini mahâllinde kabz ve zabta taslît eylediğinde ol dahi ber-minvâl-i muharrer iştirâ ve temellük ve tefevvüz ve kabûl eyledikden sonra semeni olan meblağ-ı mezbûr elli guruş mutâlebesinden müvekkilim mezbûr Mehmed Ağa mezbûr Mustafa’nın zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm mârrü’z-zikr çiftlik ta‘bîr olunur menzilin bir sehm-i şâyi‘inde müvekkilim mezbûrun kat‘a alâka ve medhali kalmayıp mezbûr Mustafa’nın mülk-i müşterâsı ve hakk-ı sarfı ve tarla-yı mezkûrlar dahi dâhil-i havza-i tasarrufu olmuşdur dedikde gıbbe’t-tasdîki’ş-şer‘î mâ-vaka‘a. Fî 20 Rebî‘ülâhir sene 1197 Şühûdü’l-hâl: Kaycalı? İsmail b. İbrahim, İslâm b. Mehmed, Cafer b. Hasan, Mumcu Ömer b. İbrahim, Seyran b. Ali, İslâm b. Feyzullah, Hasan b. Feyzullah, Seydi b. Halil, Molla Hasan b. Yakub, Hüseyin b. Yakub, Civanoğlu Hasan Beşe b. ( ).