Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 343 Hüküm no: 363 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinde ölmüş olan Hıristo v. Sano ile Eline bt. Sano’nun vârislerinden Anaştaş’ın diğer vârisler Tanaş ve Zafara’ya açtığı davaya sulh bedeli karşılığı son verildiği Mîrâsdan ibrâ Mahmiye-i İslâmbol’da Çerâğī Hasan mahallesinde mütemekkinler iken bundan akdem müte‘âkıben hâlik olan Hıristo v. Sano ve Eline bt. Sano nâm zevcânın verâsetleri kebîr oğulları Anaştaş ve Tanaş nâm zimmîler ile kebîre kızları Zafara nâm Nasrâniyeye münhasıra ve mesele-i mîrâsları beş sehm i‘tibârıyla ikişer sehmden cem‘an dört sehm oğulları merkūmân Anaştaş ve Tanaş zimmîlere ve bir sehmi kızları mersûme Zafara Nasrâniyeye isâbeti lede’ş-şer‘i’l-enver zâhir ve mütehakkık oldukdan sonra merkūm Anaştaş zimmî meclis-i şer‘-i hatîr-i lâzımü’t-tevkīrde tereke-i hâlikân-ı merkūmâna bi’l-verâse vâzı‘ü’l-yed olan karındaşları işbu bâ‘iseyü’r-rakīm merkūm Tanaş zimmî asâleten ve mersûme Zafara Nasrâniye tarafından husûs-ı âti’l-beyânda vekîl olduğu şahsı mersûmeyi ârifân Hıristo v. Panayot ve Metro v. Kosta nâm zimmîler şehâdetleriyle şer‘an sâbit olan Dimo v. Yorgo nâm zimmî muvâcehelerinde bi’l-verâse ikrâr ve takrîr-i kelâm edip ebeveynim hâlikân-ı merkūmânın hîn-i helâklerinde yanlarında mevcûde mecmû‘-ı terekelerine karındaşlarım merkūmân Tanaş ve Zafara zimmîler bi’l-verâse vâzı‘ü’l-yed olmalarıyla ebeveynim hâlikân-ı merkūmânın terekelerinden ber-i‘tibâr-ı mezkûr benim iki sehmime isâbet [53a] eden hisse-i irsiyemi ben bu esnâda karındaşlarım merkūmân Tanaş ve Zafara’dan taleb ve da‘vâya tesaddî etmişdim. El-hâletü hâzihî beynimize muslihûn tavassut edip ber-vech-i muharrer tesaddî eylediğim da‘vâ-yı mezkûremden beni karındaşlarım merkūmân Tanaş ve Zafara ile sıhhat-i sulh tehârüc-i mevcûde olup tereke-i hâlikân-ı merkūmândan benim iki sehmime isâbet edenden ezyed olduğu hâlde seksen iki guruş üzerine inşâ-i akd-i sulh eylediklerinden ben dahi sulh-ı mezkûru kabûl ve bedel-i sulh olan meblağ-ı mezbûr seksen iki guruşu karındaşlarım merkūmân Tanaş ve Zafara yedlerinden tamamen ahz ü kabz ve istifâ-yı hak edip ebeveynim hâlikân-ı merkūmânın terekelerine ve mahalle-i mezbûrede kâin ma‘lûmü’l-hudûd bir kıt‘a bağçede gedik ta‘bîr olunan âlât-ı lâzıme-i ma‘lûmeye ve hukūk-ı mîrâsa ve gayra müte‘allika âmme-i de‘âvî ve kâffe-i mutâlebâtdan karındaşlarım merkūmân Tanaş ve Zafara ile merkūme Zafara’nın zevci işbu hâzır bi’l-meclis İstirati v. Dimo nâm zimmîden her birinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde karındaşlarım merkūmân dahi kezâlik hukūk-ı mîrâsa ve sâire müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer bi’l-asâle ve bi’l-vekâle âharın ibrâsını kabûl eyledik dedikde merkūm Tanaş zimmî ile vekîl-i merkūm Dimo zimmîden her biri dahi mukırr-ı mesfûr Anaştaş zimmîyi cemî‘ kelimât-ı meşrûhasında vicâhen ve şifâhen tahkīk ve tasdîk etmeleriyle mâ-vaka‘a bi’t-taleb. Fî 21 R sene 1197 Şühûdü’l-hâl: Abdullah Efendi imâm-ı mahalle-i mezbûre, Kasab Ahmed Ağa b. Salih, İsmail Efendi b. Abdullah, Helvacı Mustafa Ağa b. Ahmed, Müezzin es-Seyyid Molla Osman, Müezzin Molla Ahmed b. ( ), Bekçi es-Seyyid Hasan Beşe b. ( ), Molla Ali b. Halil, Mitro v. Kosta, Hıristo v. Panayot, Zakri v. Vasil ve gayruhum.