Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 344 Hüküm no: 364 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çivizade mahallesinde vefat eden Fatma bt. Ömer’in küçük oğlu Mehmed Sadık’a kalan harap evi satmak için vasisine izin verildiği Vakıf menzili ferâğa vasîye izin Mahmiye-i İslâmbol’da Şehremîni kurbünde Çivizâde mahallesinde sâkine iken bundan akdem fevt olan Fatıma bt. Ömer nâm hatunun sadrî sagīr oğlu es-Seyyid Mehmed Sadık’ın babası ve tesviye-i umûrunu rü’yete kıbel-i şer‘den mansûb vasîsi işbu bâ‘isü’l-kitâb es-Seyyid Mehmed Efendi b. Mustafa meclis-i şer‘-i şerîf-i enverde bi’l-vesâye takrîr-i kelâm ve bast-ı merâm edip mahalle-i mezbûre câmi‘-i şerîfinde mevzû‘ kürsi vakfı müsakkafâtından olup yine mahalle-i mezbûrede vâki‘ ma‘lûmü’l-hudûd ve’l-müştemilât bir bâb vakıf menzil müteveffât-ı mezbûrenin hayatında ile’l-vefât bi’l-icâreteyn taht-ı tasarrufunda olup ba‘de vefâtihâ menzil-i mezkûr vasîsi olduğum oğlum sagīr-i mezbûr ile zevc-i âhardan mütevellid sadrî sagīr oğlu Ahmed’e bi’l-münâsafe intikāl-i âdî ile intikāl edip lâkin menzil-i mezkûr mürûr-ı eyyâm ile müşrif-i harâb ve mâil-i türâb olup hâsılı harcına vefâ etmemekle oğlum sagīr-i mezbûrun menzil-i mezkûrda olan nısf hissesi bedel-i misli ve bâ-ma‘rifet-i mütevellî âhara ferâğ ve kabz-ı bedel ve bedeli istirbâh olunmak sagīr-i mezbûr hakkında evlâ ve enfa‘ olduğuna binâen kıbel-i şer‘den bana izin verilmek bi’l-vesâye matlûbumdur dedikde hakīkat-i hâl vasîyy-i mezbûrun takrîr-i meşrûhu üzere olduğu zeyl-i sahîfede mektûbü’l-esâmî Müslimîn ihbârlarıyla lede’ş-şer‘i’l-enver zâhir ve mütehakkık olmağın sagīr-i mezbûrun menzil-i mezkûrda ber-vech-i muharrer mutasarrıf olduğu nısf hissesi bedel-i misli ile âhara ferâğa babası ve vasîsi mezbûr es-Seyyid Mehmed Efendi’ye kıbel-i şer‘den izin verilmeğin mâ-vaka‘a bi’t-taleb. Fî 22 R sene 1197 Şühûdü’l-hâl: Es-Seyyid Mehmed Efendi b. Hüseyin imâm-ı mahalle-i mezbûre, Mehmed Efendi b. Süleyman, Süleyman Ağa b. Mehmed ve gayruhum.