Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 345 Hüküm no: 365 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın esamesini İbrahim Ağa’ya satması Esâme kasr-ı yedi Mahrûse-i Galata’ya muzâfe Tophâne kapısı mahallâtından Çavuşbaşı mahallesinde sâkin Ali Ağa b. Mehmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-vesîka İbrahim Ağa b. Mustafa nâm kimesne mahzarında ikrâr ve takrîr-i kelâm edip benim Silahdâr ocağında on altıncı bölükde Hasan Esir ismiyle mutasarrıf olduğum yirmi dört akçe esâmîmi bundan akdem hüsn-i rızâ ve ihtiyârımla mezbûr İbrahim Ağa’ya ferâğ ve bi’l-külliye kasr-ı yed edip ibtidâ ta‘bîr olunur tezkiresini dahi yedine def‘ ve teslîm eylediğimde ol dahi bedel-i ferâğ olmak üzere bana mâlından teberru‘an iki yüz altmış dört guruş def‘ ü teslîm eyledikde ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr İbrahim Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezbûr iki yüz altmış dört guruşa müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a bi’t-taleb. Fî 23 min-R sene 1197 Şühûdü’l-hâl: Mehmed Ağa b. Ali, el-Hâc Ali b. Ali, Ahmed b. Osman, Veliyüddin b. Osman, diğer Ahmed b. Abdullah, Ebûbekir b. İsmail, Molla Ali b. Halil ve gayruhum.