Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 345 Hüküm no: 366 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin kendisini yaralaması sebebiyle Hasan Beşe’ye açtığı davaya sulh bedeli karşılığı son verildiği Cerhden ibrâ Mahmiye-i İslâmbol’da Mirâhor mahallesinde sâkin Mehmed Beşe b. Abdullah nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Hasan Beşe b. Ahmed nâm kimesne mahzarında ikrâr ve takrîr-i kelâm edip târih-i kitâbdan iki ay mukaddem mezbûr Hasan Beşe mahalle-i mezbûrede benim bi-gayrı hakkın sağ elimin ayasına bıçak ile darb ve cerh etmekle mûcib-i şer‘îsini ben bu esnâda mezbûr Hasan Beşe’den taleb ve da‘vâya tesaddî etmiş idim. El-hâletü hâzihî beynimizde muslihûn tavassutuyla ber-vech-i muharrer tesaddî eylediğim da‘vâ-yı mezkûremden beni mezbûr Hasan Beşe ile altmış para üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr altmış parayı mezbûr Hasan Beşe yedinden tamamen ahz ü kabz edip cerh-i mezkûra ve mâ-yahdüsü minhe müte‘allika âmme-i de‘âvî ve kâffe-i mutâlebâtdan mezbûr Hasan Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî 24 R sene 1197 Şühûdü’l-hâl: Ali Beşe b. Mehmed, es-Seyyid Mehmed Emin b. es-Seyyid Ahmed, İbrahim Beşe b. Ahmed, İsmail Beşe b. Osman karakullukçu ve gayruhum.