Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 346 Hüküm no: 367 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azime Hatun’un tasarruf ettiği günlük sekiz akçe gümrük vazifesini Fatma bt. Mehmed’e ferağ ettiği Vazîfe-i gümrük ferâğı Mahmiye-i İslâmbol’da Altımermer kurbünde Kâtib Muslihiddin mahallesinde sâkine ve zâtı ta‘rîf-i şer‘î ile mu‘arrefe olan Azime Hatun bt. Selim meclis-i şer‘-i hatîr-i lâzımü’t-tevkīrde mu‘arrefetü’z-zât işbu bâ‘isü’l-kitâb Fatıma bt. Mehmed nâm hatun mahzarında ikrâr ve takrîr-i kelâm edip benim İslâmbol Gümrük-i Kebîr Mukāta‘ası mâlından almak üzere Azime Kerime eş Selim ismiyle mutasarrıfa olduğum yevmî sekiz akçe vazîfemi hüsn-i rızâ ve ihtiyârımla mezbûre Fatıma Hatun’a ferâğı ve bi’l-külliye kasr-ı yed edip tezkiresini dahi yedine teslîm ve ol dahi mâlından altmış dört guruş teberru‘an bana def‘ ü teslîm eyledikde ben dahi yedinden tamamen ahz ü kabz ve umûruma sarfla istihlâk eylediğimden sonra ben vazîfe-i mezkûreye müte‘allika âmme-i de‘âvî ve kâffe-i mutâlebâtdan mezbûre Fatıma Hatun’un zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezbûr altmış dört guruşa müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a bi’t-taleb. Fî 24 R sene 1197 Şühûdü’l-hâl: Sarrâc Ahmed Ağa b. ( ), Arabacı Hüseyin Ağa b. ( ), Molla Ali b. Halil, Salih b. Halil ve gayruhum.