Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 346 Hüküm no: 368 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Ayşe Hatun ile Osman b. Mehmed’in boşandıkları İstihbâr-ı tatlîk Mahmiye-i İslâmbol’da Ali Fakih mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Âişe Hatun bt. İsmail’den meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimîn’den mahalle-i mezbûre ahâlisinden el-Hâc Mehmed b. Ahmed ve Ali Beşe b. Hasan nâm kimesneler zât-ı müstahbire-i mezbûreyi ârifân oldukları hâlde li-ecli’l-ihbâr meclis-i şer‘e hâzırân olup istihbâr olunduklarında fi’l-hakīka işbu müstahbire-i mezbûrenin zevci es-Seyyid Osman b. Mehmed nâm kimesne bin yüz doksan altı senesi Zilhicceti’ş-şerîfesinin on beşinci günü mahalle-i mezbûrede kâin manav dükkânı önünde medîne-i Üsküdar’a gider olduğu hâlde zevcesi müstahbire-i mezbûreye hitâb edip eğer ben yarınki gün medîne-i mezbûreden gelmez isem zevcem mezbûre Âişe Hatun benden boş olsun deyü şart ve ta‘lîk eylediği gün medîne-i mezbûreye gidip elân gelmemekle târih-i mezbûrdan beri zevcesi müstahbire-i mezbûre Âişe Hatun zevci mezbûr es-Seyyid Osman’dan mübâne olmuşdur, biz bu husûsa bu vech üzere şâhidleriz ve inde’l-hasm şehâdet dahi ederiz deyü her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 25 R sene 1197 Şühûdü’l-hâl: el-Hâc Mehmed b. Ahmed, Ali Beşe b. Hasan, Molla Ali b. Halil.