Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 347 Hüküm no: 369 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Hıristo’nun Edirnekapısı’ndaki işkembeci dükkânında bulunan gedik denilen eşyalardaki hakkını kızı Licse’ye sattığı Gedik mübâya‘ası işkenbecilerin Mahmiye-i İslâmbol’da Edirnekapısı dâhilinde kâin işkenbeci dükkânında mütemekkin Yorgi v. Hıristo nâm zimmî meclis-i şer‘-i şerîf-i enverde sulbiye kebîre kızı işbu hâmiletü’r-rakīm Licse nâm Nasrâniye tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan Koca v. Petro nâm zimmî muvâcehesinde ikrâr ve takrîr-i kelâm edip sâlifü’z-zikr işkenbeci dükkânında mevcûd beyne’l-hıref gedik ta‘bîr olunur iki kazgan ve üç kefçe ve iki koğa ve bir bıçak ve bir kanca ve bir destgâh ve bir re’s himâr ve sâir âlât-ı lâzıme-i ma‘lûmenin nısf-ı şâyi‘leri Tanun nâm zimmînin ve nısf-ı şâyi‘i dahi benim yedimde mülk ve hakkımız olmağın ben eşyâ-i muharrere-i mezkûre ve sâir âlât-ı lâzıme-i ma‘lûmede ber-vech-i muharrer mâlik olduğumuz nısf hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile târih-i kitâbdan üç sene mukaddem kızım müvekkile-i mersûme Licse Nasrâniyeye yüz guruşa bey‘ ve temlik ve teslîm eylediğimde ol dahi târih-i mezbûrda ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz guruş mutâlebesinden kızım müvekkile-i mersûme Licse Nasrâniyenin zimmetini ibrâ ve ıskāt eylediğimde ol dahi ibrâmı kabûl etmeğin ol-vechile mârrü’z-zikr gedik ta‘bîr olunan eşyâ-i muharrere-i mezkûre ve sâir âlât-ı lâzıme-i ma‘lûmenin nısf-ı şâyi‘leri târih-i mezbûrdan beri kızım müvekkile-i mersûme Licse Nasrâniyenin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 22 R sene 1197 Şühûdü’l-hâl: Ahmed b. Hasan kethudâ, Diğer Ahmed b. Mehmed, Hasan b. Abdullah, İbrahim b. Murtaza, Bayram b. Hasan, Molla Ali b. Halil, Tarabet v. Seder, Licka v. Leco, Tanaş v. Miho, Yorgo v. Ermenko, İlya v. Yorgo, Eci Miço v. Dimo, Tavukpazarlı Andon ve gayruhum.