Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 348 Hüküm no: 370 Orijinal metin no: [53b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Efendi’nin Seydihalife mahallesinde yanmış olan evin arsasını Abdülkerim Efendi’ye sattığı Arsa mübâya‘ası Mahmiye-i İslâmbol’da Seydihalîfe mahallesinde sâkin ve mahalle-i mezbûre imâmı Yahya Efendi b. Zekeriya meclis-i şer‘-i şerîf-i enverde işbu bâ‘isü’l-kitâb Abdülkerim Efendi b. Abdulkadir mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan mahalle-i mezbûre imâmı süknâsı ve bir tarafdan mârrü’z-zikr Seydihalîfe Câmi‘-i şerîfi ve bir tarafdan Bursalı Mustafa arsası ve bir tarafdan tarîk-i hâs ile mahdûd derûnunda bir bi’r-i mâ ve zikr olunan imâm süknâsı tarafından taş duvarı müştemil bir bâb muhterik mülk menzil arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Abdülkerim Efendi’ye yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz guruşu yedinden tamamen ahz ü kabz eyledim, ba‘de’l-yevm arsa-i mahdûde-i mezkûre zikr olunan taş duvarıyla mezbûr Abdülkerim Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 24 R sene 1197 Şühûdü’l-hâl: Ömer Efendi b. Mehmed imâm vekîli, Molla Mehmed b. Ahmed, Molla Ali b. Halil ve gayruhum.