Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 348 Hüküm no: 371 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dokni’nin ölmüş olan Todori v. Dimitraki’nin kızı olduğuna dair şahitleri olduğu İstihbâr-ı menzil Havâss-ı Refî‘a kazâsına tâbi‘ Makrihora karyesinde mütemekkin iken bundan akdem hâlik olan Todori v. Dimitraki nâm zimmînin sulbiye kebîre kızı ve hasran vârisesi olup şahsı vech-i şer‘î üzere mu‘arrefe olan işbu bâ‘isetü’r-rakīm Dokni nâm Nasrâniye meclis-i şer‘-i şerîf-i enverde takrîr-i kelâm ve bast-ı merâm edip karye-i mezbûrede vâki‘ bir tarafdan Pehlivan Mehmed menzili ve bir tarafdan Mehmed Efendi bahçesi ve bir tarafdan Peraşko zimmî menzili ve bir tarafdan tarîk-i âm ile mahdûd tahtânî bir bâb oda ve bir sofa ve bir kenîf ve havluyu müştemil bir bâb mülk menzil mûrisim Todori zimmînin hayatında ile’l-helâk yedinde mülk ve hakkı olup ba‘de helâk menzil-i mahdûd-ı mezkûr ancak bana mevrûs olmağla menzil-i mahdûd-ı mezkûr ber-vech-i muharrer mülk-i mevrûsum olduğunu müş‘ir yedimde hüccetim olmamağla takrîrim vukūf-ı tammı olan bî-garaz kimesnelerden suâl ve istihbâr ve haberleri zabt ve tahrîr ve hüccet olunup yedime i‘tâ olunmak matlûbumdur dedikde hakīkat-i hâl mukırre-i mersûme Dokni Nasrâniyenin bâlâda bast-ı beyân ve şerh-i ayân eylediği minvâl üzere olduğunu karye-i mezbûre ahâlisinden Musa Ağa b. Mustafa nâm kimesne ile İstavri v. Andon nâm zimmîden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 24 min-R sene 1197 Şühûdü’l-hâl: Musa Ağa b. Mustafa, Molla Ali b. Halil, Salih b. Halil, Mustafa b. Mustafa ve gayruhum.