Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 349 Hüküm no: 372 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Fatma Hatun ile Mehmed b. Hasan’ın boşandıkları Muhâla‘a Mahmiye-i İslâmbol’da Koca Mustafa Paşa mahallesinde sâkine ve zâtı ta‘rîf-i şer‘î ile mu‘arrefe olan Fatıma Hatun bt. Abdullah meclis-i şer‘-i hatîr-i lâzımü’t-tevkīrde zevc-i dâhili işbu bâ‘isü’l-kitâb es-Seyyid Mehmed b. Hasan nâm kimesne mahzarında ikrâr ve takrîr-i kelâm edip mezbûr es-Seyyid Mehmed zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcem mezbûrun zimmetinde mütekarrer ve ma‘kūdun-aleyh olan on altı guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Mehmed ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve zevcim mezbûrdan cihet-i karzdan olan yüz yedi guruşun yirmi guruşundan mâ‘adâsı olan seksen yedi guruşa ve zevcim mezbûr bundan akdem sille ile sağ gözüme darb etmiş idi deyü tesaddî eylediğim darb da‘vâsına ve ibtidâ zevciyetden târih-i kitâba gelince bi’l-cümle hukūk-ı sâireye müte‘allika âmme-i de‘âvî ve kâffe-i mutâlebâtdan zevcim mezbûr es-Seyyid Mehmed’in zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik hukūk-ı zevciyete ve gayra müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 24 R sene 1197 Şühûdü’l-hâl: Berber Mehmed b. Yusuf, Ahmed Odabaşı b. Mehmed, Molla Ali b. Halil, Salih b. Halil.