Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 350 Hüküm no: 373 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cebeci mahallesinden Hadice bt. Abdullah’ın bazı eşyasını Dilruba bt. Abdullah’a sattığı Eşyâ mübâya‘ası Mahmiye-i İslâmbol’da Sultan Selim kurbünde Cebecibaşı mahallesinde sâkine ve zâtı vech-i şer‘î üzere mu‘arrefe olan Hadice bt. Abdullah nâm hatun meclis-i şer‘-i şerîf-i enverde kezâlik zâtı vech-i şer‘î üzere mu‘arrefe olan işbu bâ‘isetü’l-kitâb Dilruba bt. Abdullah nâm hatun mahzarında ikrâr ve takrîr-i kelâm edip eşyâ-yı memlûke bâ-defter-i müfredât yün memlû altı beledî yasdık ve iki minder ve bir yemeni yorgan bâ-çârşeb ve bir Yanbolu kebesi ve iki tencere ma‘a kapak ve bir sahan ve bir leğen ma‘a ibrik ve bir çuka ferâcemi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Dilruba Hatun’a yirmi guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve ve kabûl eyledikden sonra semeni olan yirmi guruş mutâlebesinden mezbûre Dilruba Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm eşyâ-yı muharrere-i mezkûre, mezbûre Dilruba Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 25 R sene 1197 Şühûdü’l-hâl: el-Hâc İsmail Efendi, Mustafa Ağa b. Mehmed, el-Hâc Hüseyin çukadâr, Molla Ali b. Halil.