Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 350 Hüküm no: 374 Orijinal metin no: [54a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Mehmed b. Ahmed’in vasiyetini yerine getirmesi için karısını vasi tayin ettiği Vasiyet Mahmiye-i İslâmbol’da İskender Ağa mahallesinde sâkin Mehmed b. Ahmed nâm kimesne meclis-i şer‘-i hatîr-i lâzımü’t-tevkīrde hâlâ zevcesi işbu bâ‘isetü’l-kitâb Zeliha bt. Mustafa nâm hatun mahzarında ikrâr ve takrîr-i kelâm edip ben bi-emrillâh vefât eylediğimde zevcem mezbûre Zeliha Hatun benim vasîyy-i muhtârım olup mecmû‘-ı tereke ve gāibûn ani’l-meclis Kesercioğlu Ahmed Beşe zimmetinde on guruş ve Na‘linci Mustafa Beşe zimmetinde elli guruş ve kuzâtdan Mustafa Efendi zimmetinde on altı guruş ve ammi odabaşı zimmetinde on üç guruş ve Bostânî Ahmed ve İsmail nâm karındaşlar zimmetlerinde yüz sekiz guruş ve Karabıçak Hasan Beşe zimmetinde beş guruş ve Yorganî İbrahim Ağa zimmetinde dört guruş ki cem‘an iki yüz altı guruş alacak hakkımı mezbûrûndan ahz ü kabz edip evvelâ vech-i mesnûn üzere techîz ve tekfîn ve mesârif-i defnim umûruna terekemden yirmi guruş harc ü sarf ile ve zevcem mezbûreye zimmetimde ma‘kūdun-aleyh olan yirmi guruş mehr-i müecceli ile zevcem vasîyy-i mezbûreye zimmetimde cihet-i karzdan vâcibü’l-edâ deynim olan seksen guruşu ba‘de’l-ahz ve’l-kabz bâkī terekemin sülüsünü ifrâz ve sülüs-i mezbûrdan yirmi beş guruş ıskāt-ı salât ve keffârâtım içün fukarâ-i Müslimîn beyninde devr ve tasadduk eyleye ve sülüs-i mezbûrdan beş guruş ile iki aded taş iştirâ edip alâmet içün baş ve ayak câniblerine vaz‘ etdire ve sülüs-i mezbûr her ne fazla kalır ise zevcem vasîyy-i mezbûre kendi re’yi üzere vücûh-ı birre harc u sarf eyleye ve sülüsân-ı bâkıyemi dahi zevcem vasîyy-i mezbûre ile zî-rahm cihetinden sulbiye kızım evlâdı Mehmed ve sulbiye Ümmügülsüm beynlerinde alâ-mâ-farazallâh tevzî‘ ve taksîm eyleyeler deyü vasiyet ve tenfîzine zevcesi mezbûre Zeliha Hatun’u vasîyy-i muhtâr nasb ve ta‘yîn eyledim dedikde ol dahi ber-minvâl-i muharrer vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb. Fî 24 R sene 1197 Şühûdü’l-hâl: Mehmed Efendi b. Halil imâm-ı mahalle-i mezbûre, Müezzin Molla Mustafa b. Halil, Ebûbekir Efendi b. ( ), Mütevellî İsmail Ağa b. Abdülhamid, Mehmed Emin Ağa b. İbrahim, Musa Ağa b. Mehmed, İsmail Beşe b. ( ), Mustafa Beşe hatab yarıcı, Süleyman Ağa ve gayruhum.