Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 352 Hüküm no: 376 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşanmış olan Hafize bt. Ahmed’in küçük oğlu Kasım’a nafaka tayini Nafaka-i sagīr Mahmiye-i İslâmbol’da Altımermer kurbünde Kâtib Muslihiddin mahallesinde sâkine ve zâtı vech-i şer‘î üzere mu‘arrefe olan işbu bâ‘isü’l-kitâb Hafize Hatun bt. Ahmed meclis-i şer‘-i hatîr-i lâzımü’t-tevkīrde zevc-i muhâlı‘ı Süleyman Beşe b. Kasım nâm kimesne mahzarında takrîr-i kelâm ve bast-ı merâm edip zevc-i muhâlı‘-ı mezbûrun firâşından hâsıl ve benden mütevellid hâlâ bi-hakkı’l-hıdâne hacr u terbiyemde olan sadrî oğlum Kasım nâm sagīrin mâlı olmayıp nafaka ve kisveye ihtiyâcı olmağla oğlum sagīr-i mezbûrun nafaka ve kisve-bahâsı içün babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīr-i mezbûr Kasım’ın nafaka ve kisve-bahâsı içün babası mezbûr Süleyman Beşe üzerine bi’t-terâzî târih-i kitâbdan küllü yevm dörder para farz ve takdîr edip meblağ-ı mefrûz-ı mezkûru sagīr-i mezbûrun nafaka ve kisvesine harc u sarfa ve lede’l-iktizâ istidâneye ve inde’z-zafer babası mezbûr Süleyman Beşe üzerine rücû‘a mezbûre Hafize Hatun’a izin vermeğin mâ-vaka‘a bi’t-taleb. Fî 25 R sene 1197 Şâhidûn-ı sâbıkūn.