Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 352 Hüküm no: 377 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evliya mahallesinden Fatma Hatun’un vasiyetini yerine getirmesi için kocasını vasi tayin ettiği Husûs ile vasiyet Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden mezûnen irsâl olunan mevlana Hafız Numan Efendi b. Süleyman mahmiye-i İslâmbol’da Mevlevîhâne kapısı dâhilinde el-Hâc Evliyâ mahallesinde kâin el-Hâc Yahya Efendi b. Mustafa’nın sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde menzil-i mezkûrda sâkine ve zâtı Müslimûn-ı merkūmûn ta‘rîfleriyle mu‘arrefe olan Fatıma Hatun bt. Mustafa meclis-i ma‘kūd-ı mezkûrda hâlâ zevci işbu bâ‘isü’l-kitâb mezbûr el-Hâc Yahya Efendi mahzarında ikrâr ve takrîr-i kelâm edip zevcim mezbûr el-Hâc Yahya Efendi zimmetinde ma‘kūdun-aleyh olan kırk guruş mehr-i müeccelimi hibetü’d-deyn mimmen aleyhi’d-deyn sahîhatün fehvâsınca zevcim mezbûr el-Hâc Yahya Efendi’ye hibe ve temlik eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve kabûl eyledikden sonra ben bi-emrillâhi te‘âlâ vefât eylediğimde zevcim mezbûr el-Hâc Yahya Efendi benim vasîyy-i muhtârım olup mecmû‘-ı terekem ile zimem-i nâsda olan hukūkumu ahz ü kabz eyledikden sonra evvelâ vech-i mesnûn üzere techîz ve tekfîn ve levâzım-ı defnim umûruna terekemden on beş guruş zam edip bâkī kalan terekemin sülüsü ifrâz ve sülüs-i mezbûrdan otuz guruş ıskāt-ı salât ve keffârâtım içün fukarâ Müslimîn beyninde devr ve tasadduk eyleye ve sülüs-i mezbûrdan beş guruş ile iki aded taş iştirâ ve alâmet içün merkadimin baş ve ayak câniblerine vaz‘ etdire ve sülüs-i mezbûrdan beş guruş ile tabh-ı helva ve it‘âm-ı fukarâ oluna ve sülüs-i mezbûrdan her ne fazla kalır ise zevcim vasîyy-i mezbûr kendi re’yi üzere vücûh-ı birre harc u sarf eyleye sülüsân-ı bâkıyemden dahi zevcim mezbûr el-Hâc Yahya Efendi’ye isâbet eden nısf hisse-i irsiyesini kabz ve nısf-ı âharını dahi li-ebeveyn kız karındaşım olup vilâyet-i Rumeli’de Baba-yı Atik kasabasında sâkine Hadice nâm hatuna îsâl ve teslîm eyleye deyü vasiyet ve tenfîzine zevci mezbûr el-Hâc Yahya Efendi’yi vasîyy-i muhtâr nasb ü ta‘yîn eylediğinde ol dahi ber-minvâl-i muharrer vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm eylediğini mevlana-yı mezbûr mahâllinde ketb ü tahrîr ba‘dehû mâ‘an meb‘ûs ümenâ-i şer‘le meclis-i şer‘e gelip alâ-vukū‘ıhî inhâ ve takrîr etmeğin mâ-vaka‘a bi’t-taleb. Fî 26 R sene 1197 Şühûdü’l-hâl: Mustafa Efendi b. Ali imâm-ı mahalle-i mezbûre, Kuzâtdan Ali Efendi b. İbrahim, Müezzin Molla Mustafa b. Veliyüddin, el-Hâc Mehmed Ağa b. Abdullah, diğer el-Hâc Mehmed Ağa b. Süleyman, Ahmed Ağa b. Mustafa, Mehmed Ârif b. Mehmed, Molla Ali b. Halil ve gayruhum.