Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 353 Hüküm no: 378 Orijinal metin no: [54b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Nesibe bt. Abdullah’ın Zeyneb bt. Abdullah’a eşyasının bir kısmını hibe ettiği bir kısmını da sattığı Eşyâ mübâya‘ası Mahmiye-i İslâmbol’da Ali Fakih mahallesinde sâkine ve zâtı vech-i şer‘î üzere mu‘arrefe olan Nesibe bt. Abdullah nâm hatun meclis-i şer‘-i şerîf-i enverde mu‘arrefetü’z-zât işbu bâ‘isetü’l-kitâb Zeyneb bt. Abdullah nâm hatun mahzarında ikrâr ve takrîr-i kelâm edip ben mezbûre Zeyneb Hatun’un menzilinin bir odasında sâkine olmamla yedimde mâlım ve mülküm olan ancak zümrüd taşlı bir çift altın küpe ve bir altın yüzük ve dört minder ve kıtık memlû dokuz çatma yasdık ve dört yemeni baş yasdığı ve altı yemeni yorgan bâ-çârşeb ve bir beledî döşek ve iki şilte ve dört döşek çârşebi ve iki basma mak‘ad ve bir kapı perdesi ve bir kaliçe seccâde ve bir mâi beylik ve biri çiçekli ve biri şalî iki entari ve şala kaplı bir sincab kürk ve bir çuka ferâce ve bir şalî hırka ve bir şalî şalvar ve beş gömlek ma‘a don ve bir yaşmak ve makrame ve on sahan ve on kapak ve bir şorba tası ve üç tencere bâ-kapak ve iki sini ve bir kadayıf tepsisi ve bir leğen ma‘a ibrik ve bir tâbe ve bir güğüm ve bir kazgan ve bir kahve ibriği ve bir kefgir ma‘a kefçe ve bir hamam takımı ve bir tahta sandık ve bir sepet sandığa münhasıra olmağla ben zikr olunan bir çift altın küpe ve bir altın yüzüğümü hibe-i sahîha-i şer‘iye ile [55a] mezbûre Zeyneb Hatun’a hibe ve temlik ve teslîm eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz ve kabûl eyledikden sonra eşyâ-i muharrere-i mezkûremi dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Zeyneb Hatun’a seksen guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr seksen guruş mutâlebesinden mezbûre Zeyneb Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm zikr olunan küpe ve yüzük mezbûre Zeyneb Hatun’un mülk-i mevhûbesi ve eşyâ-yı muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 26 R sene 1197 Şühûdü’l-hâl: Hafız Hüseyin Efendi b. Hasan imâm-ı mahalle-i Davudpaşa, Hasan Ağa b. Süleyman, Mustafa Çavuş Ağa b. Osman, es-Seyyid Mahmud Ağa b. Yusuf, Berber es-Seyyid Mehmed b. Mustafa, Ali Ağa b. Mustafa, Kapı kethudâsı Ali Ağa b. Mehmed ve gayruhum.