Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 355 Hüküm no: 380 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesinden Mehmed Ağa’nın bazı eşyalarını hanımı Şerife Hafize’ye sattığı Eşyâ mübâya‘ası Mahmiye-i İslâmbol’da Deniz Abdal mahallesinde sâkin Mehmed Ağa b. Hüseyin nâm kimesne meclis-i şer‘-i hatîr-i lâzımü’t-tevkīrde hâlâ zevcesi mu‘arrefetü’z-zât işbu bâ‘isetü’l-kitâb Şerife Hafize bt. es-Seyyid nâm hatun mahzarında ikrâr ve takrîr-i kelâm edip yedimde mâlım ve mülküm olan kıtık memlû sekiz beledî yasdık ve dört minder ve iki baş yasdığı ve bir yemeni yorgan ma‘a çârşeb ve bir hilâlî çalar sâ‘at ve bir beledî döşek ve üç beylik ve altı sahan ma‘a kapak ve bir lenger ve üç tencere ma‘a kapağımı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcem mezbûre Şerife Hafize Hatun’a yirmi guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mutâlebesinden zevcem mezbûre Şerife Hafize Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm eşyâ-yı muharrere-i mezkûre zevcem mezbûre Şerife Hafize Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mukırr-ı mezbûr Mehmed Ağa yine meclis-i şer‘de zevcesi mezbûre Şerife Hafize Hatun mahzarında i‘âde-i kelâm edip zevcem mezbûre ile mahalle-i mezbûrede vâki‘ mâ‘an sâkinler olduğumuz menzil derûnunda mevcûde bisât-ı beyt ve evân-ı nühâsiye ve gayr-ı nühâsiye ve bi’l-cümle eşyâ-i ma‘lûme zevcem mezbûrenin mâlı ve mülkü olup benim kat‘a alâka ve medhalim olmadığından gayrı benim zevcem mezbûre Şerife Hafize Hatun’a elli guruş mehr-i müeccel hakkı zimmetimde deynimdir dedikde mâ-vaka‘a bi’t-taleb. Fî 25 R sene 1197 Şühûdü’l-hâl: Hüseyin b. el-Hâc Mehmed, Feyzullah b. el-Hâc Mehmed, Molla Ali b. Halil, Salih b. Halil, Mustafa b. Mustafa.