Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 356 Hüküm no: 381 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Ömer mahallesinde vefat eden Nefise bt. Abdullah’ın vârisleri arasındaki davaya sulh bedeli karşılığı son verildiği Tarladan ibrâ tehârüc tarîkiyle Mahmiye-i İslâmbol’da es-Seyyid Ömer mahallesinde sâkine iken bundan akdem fevt olan Nefise bt. Abdullah nâm hatunun verâseti zevc-i metrûkü es-Seyyid Salih Ağa ile zevc-i âhardan mütevellide sadriye kebîre kızı Ümmügülsüm bt. Mehmed nâm hatuna münhasıra ve terekesinin rub‘u zevci mezbûr es-Seyyid Salih Ağa’ya ve selâse-i erbâ‘ı farzan ve redden kızı mezbûre Ümmügülsüm Hatun’a isâbeti lede’ş-şer‘i’l-enver zâhir ve mütehakkık oldukdan sonra mezbûre Ümmügülsüm Hatun’un li-ebeveyn ammisi ve tarafeynden husûs-ı âti’l-beyânı ikrâra vekîl olduğu zâtını ârifân Ali Ağa b. Mehmed ve İbrahim b. Ahmed nâm kimesneler şehâdetleriyle şer‘an sâbit olan Çorbacı İsmail Ağa b. İbrahim meclis-i şer‘-i hatîr-i lâzımü’t-tevkīrde tereke-i müteveffât-ı mezbûreye bi’l-verâse vâzı‘ü’l-yed olan işbu bâ‘isü’l-kitâb zevc-i mezbûr es-Seyyid Salih Ağa mahzarında bi’l-vekâle ikrâr ve takrîr-i kelâm edip müvekkilem mezbûre Ümmügülsüm Hatun’un mûrisesi vâlidesi müteveffât-ı mezbûrenin hîn-i vefâtında yanında mevcûd bi’l-cümle terekesinden on çatma yasdık ve üç minder ve üç tencere ma‘a kapak ve on sahan ve üç yorgan ma‘a çârşeb ve bir güğüm ve bir sini ve bir çift altın kuşak ve bir çift altın bileziğine zevci mezbûr es-Seyyid Salih Ağa bi’l-verâse vâzı‘ü’l-yed olmağla müvekkilim mezbûre Ümmügülsüm Hatun mûrisesi müteveffât-ı mezbûrenin tereke ve zevci mezbûr zimmetinde ma‘kūdun-aleyh olan iki bin akçe mehr-i müeccelinden i‘tibâr-ı mezkûr üzere üç sehm hisse-i irsiyesini mezbûr es-Seyyid Salih Ağa’dan bu esnâda taleb ve da‘vâya tesaddî etmişdi. El-hâletü hâzihî beynlerine muslihûn tavassutuyla ber-vech-i muharrer tesaddî eylediği da‘vâ-yı mezkûresinden mezbûr es-Seyyid Salih Ağa ile sıhhat-i sulh tehârüc-i mevcûde olduğu hâlde tereke-i müteveffât-ı mezbûreden müvekkilem mezbûrenin ber-i‘tibâr-ı mezkûr üç sehm hissesinden ezyed olan seksen guruş üzerine inşâ-i akd-i sulh eylediklerinde ol dahi sulh-ı mezkûru kabûl ve bedel-i sulh olan meblağ-ı mezbûr seksen guruşu müvekkilem mezbûre Ümmügülsüm Hatun mezbûr es-Seyyid Salih Ağa yedinden tamamen ahz ü kabz ve istifâ-yı hak edip müvekkilem mezbûre vâlidesi mûrisesi müteveffât-ı mezbûrenin kalîl ü kesîr terekesine ve mehr-i müecceline ve bi’l-cümle hukūk-ı mîrâsa ve sâire müte‘allika âmme-i de‘âvî ve kâffe-i mutâlebâtdan müvekkilem mezbûre Ümmügülsüm Hatun ve mezbûr es-Seyyid Salih Ağa’nın zimmetini ibrâ-yı âmm-ı kātı‘u’n-nizâ‘la [55b] ibrâ ve ıskāt eylediğinde ol dahi ibrâsını kabûl eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 25 min-şehri Rebî‘ülâhır sene 1197 Şühûdü’l-hâl: Mehmed Ağa b. Hasan, Abdullah Ağa b. Mustafa, Halil Ağa b. Mustafa, Mazlum Mustafa, Hafız Abdullah Efendi, Ali Ağa b. Mehmed, İbrahim b. Ahmed ve gayruhum.