Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 357 Hüküm no: 382 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evliya Hoca mahallesinden Ali Ağa’nın Kastomonu’daki ev, harman yeri, tarla ve çayırlarını İbrahim Beşe’ye sattığı Anadolu’dan emlâk mübâya‘a ve tarla ferâğı Vilâyet-i Anadolu’da Kastamonu sancağında Çeklene kazâsına tâbi‘ Borovo nâm karye ahâlisinden olup medîne-i Üsküdar’da Evliyâhoca mahallesinde sâkin Ali Ağa b. İsmail nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb İbrahim Beşe b. Mustafa nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin şirâen yedimde mülküm olup karye-i mezbûrede vâki‘ bir tarafdan İmâm Molla Mehmed menzili ve bir tarafdan müsâfir odası ve bir tarafdan su çeşmesi ve bir tarafdan tarîk-i âm ile mahdûd derûnunda bir âhûru müştemil bir bâb mülk menzil arsamı ve yine karye-i mezbûrede vâki‘ bir tarafdan Salih menzili ve bir tarafdan mer‘a ve bir tarafdan mezbûr İmâm Molla Mehmed’in harman yeri ve bir tarafdan tarîk-i hâs ile mahdûd bir bâb âhar mülk menzil arsamı ve yine karye-i mezbûrede vâki‘ ma‘lûmü’l-hudûd iki kıt‘a harman yerlerimi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr İbrahim Beşe’ye elli guruşa bey‘ ve temlik ve yine karye-i mezbûre hudûdu dâhilinde vâki‘ lede’l-ahâli ve’l-cîrân ma‘lûmü’l-hudûd ve’l-kat‘ derûnlarında eşcâr-ı müsmire ve gayr-ı müsmireli tarla ve çayırların nısf-ı şâyi‘leri benim ve nısf-ı âharları dahi Salih b. Mustafa’nın taht-ı tasarrufumuzda olmağın ben zikr olunan tarla ve çayırlarda ber-vech-i muharrer mutasarrıf olduğum nısf şâyi‘lerimi dahi yüz elli guruş bedel mukābelesinde mezbûr İbrahim Beşe’ye bâ-ma‘rifet-i sâhib-i arz ferâğ ve tefvîz ve her birinizi mahâllinde kabz ve tasarrufa taslît eylediğimde ol dahi ber-minvâl-i muharrer iştirâ ve temellük ve tefevvüz ve kabûl eyledikden sonra semen-i mezkûr elli guruş ile bedel-i merkūm yüz elli guruş ki cem‘an iki yüz guruşu mezbûr İbrahim Beşe yedinden tamamen ahz ü kabz eyledim, ba‘de’l-yevm zikr olunan arsalar ve harman yerleri mezbûr İbrahim Beşe’nin mülk-i müşterâsı ve zikr olunan tarla ve çayırların nısf-ı şâyi‘leri dâhil-i havza-i tasarrufu olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 26 R sene 1197 Şühûdü’l-hâl: Hasan Ağa b. Derviş Mehmed, diğer Hasan b. Hüseyin, Molla Ahmed b. Mustafa, İsmail b. Abdullah, diğer Hasan b. Mustafa, Molla Ali b. Halil, Salih b. Halil ve gayruhum.