Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 358 Hüküm no: 383 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davudpaşa mahallesinden Naile bt. Abdullah ile Hasan b. Abdurrahman’ın boşandıkları Muhâla‘a Medîne-i Üsküdar’da Davudpaşa mahallesinde sâkine ve zâtı vech-i şer‘î üzere mu‘arrefe olan Nâile bt. Abdullah nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Hasan b. el-Hâc Abdurrahman nâm kimesne mahzarında ikrâr ve takrîr-i kelâm edip mezbûr Hasan zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan otuz üç guruş mehr-i müeccilim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Hasan ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvîden ve kâffe-i mutâlebâtdan ben zevcim mezbûr Hasan’ın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb. Fî 27 R sene 1197 Şühûdü’l-hâl: Es-Seyyid Mehmed b. es-Seyyid Hüseyin, Abdullah b. ( ), Molla Ali b. Halil, Salih b. Halil.