Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 359 Hüküm no: 385 Orijinal metin no: [55b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rüstempaşa mahallesinden Hüseyin Ağa’nın yevmi otuz yedi akçe olan esamesini Mustafa b. Hüseyin’e sattığı Esâme kasr-ı yedi vekâleten Vilâyet-i Anadolu’da Nevşehir kazâsına tâbi‘ Uçhisâr karyesi ahâlisinden olup mahmiye-i İslâmbol’da Rüstempaşa mahallesinde sâkin el-Hâc Hüseyin Ağa b. Mehmed nâm kimesne meclis-i şer‘-i şerîf-i enverde işbu bâ‘isü’l-kitâb Mustafa b. Hüseyin nâm kimesne tarafından husûs-ı âti’l-beyânda vekîl olduğu Osman Ağa b. Mehmed ve Mustafa b. Osman nâm kimesneler şehâdetleriyle şer‘an sâbit olan Hasan b. Mustafa nâm kimesne mahzarında ikrâr ve takrîr-i kelâm edip benim Silahdâr ocağında yedinci bölükde Hüseyin Mehmed İslâmbol ismiyle mutasarrıf olduğum yevmî otuz yedi akçe esâmîmi bundan akdem hüsn-i rızâ ve ihtiyârımla müvekkil-i mezbûr Mustafa’ya ferâğ ve bi’l-külliye kasr-ı yed ve ibtidâ ta‘bîr olunur tezkiresini yedine teslîm eylediğimde ol dahi bedel-i ferâğ olmak üzere bana mâlından teberru‘an dört yüz seksen beş guruş def‘ ve teslîm eyledikde ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan müvekkil-i mezbûr Mustafa’nın zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u meblağ-ı müstehlek-i mezbûr dört yüz seksen beş guruşa müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teber mâ-vaka‘a. Fî 23 R sene 1197 Şühûdü’l-hâl: Ebûbekir Çavuş Ağa b. İbrahim, Mustafa Çavuş Ağa, Molla Ali b. Halil, diğer Molla Ali b. Ali, Osman Ağa b. Mustafa, Mustafa b. Osman ve gayruhum.