Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 359 Hüküm no: 386 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Makrihora köyünden Dokni bt. Todori’nin evini Pehlivan Mehmed Beşe ile Mustafa b. Ahmed’e sattığı Menzil mübâya‘ası istihbârı iki kâğıd mukaddemdir. Havâss-ı Refî‘a kazâsına [tâbi‘] Makrihora nâm karyede mütemekkine ve şahsı ta‘rîf-i şer‘ ile mu‘arrefe olan Dokni bt. Todori nâm Nasrâniye meclis-i şer‘-i hatîr-i lâzımü’t-tevkīrde yine karye-i mezbûrede sâkinler işbu bâ‘iseyü’l-kitâb kendi nefsinden asîl ve li-ebeveyn er karındaşı Mustafa b. Ahmed nâm kimesne tarafından ber-vech-i âtî tasdîka vekîl olduğu nehc-i şer‘î ve tarîk-i mer‘î üzere sâbit olan Pehlivan Mehmed Beşe b. el-mezbûr Ahmed nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye irsen yedimde mülk ve hakkım olup karye-i mezbûrede vâki‘ bir tarafdan müşterî-i mezbûr Pehlivan Mehmed Beşe menzili ve bir tarafdan Mehmed Efendi bağçesi ve bir tarafdan Peraşkove zimmî menzili ve bir tarafdan tarîk-i âm ile mahdûd tahtânî bir bâb oda ve bir sofa ve kenîf ve bir mikdâr havluyu müştemil bir bâb mülk menzilimi cümle-i tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Pehlivan Mehmed Beşe müvekkil-i mezbûr Mustafa’ya bi’l-münâsafe seksen guruşa bey‘ ve temlik ve mahâllinde teslîm eylediğimde ol dahi ber-vech-i muharrer bi’l-asâle ve bi’l-vekâle iştirâ ve temellük ve tesellüm ve kabûl eyledikden sonra semeni olan meblağ-ı mezbûr seksen guruşu yedlerinden tamamen ahz ü kabz eyledim, ba‘de’l-yevm menzil-i mahdûd-ı mezkûr cemî‘ müştemilâtıyla mezbûr Pehlivan Mehmed Beşe ile müvekkil-i mezbûr Mustafa’nın bi’l-münâsafe mülk-i müşterâları ve hakk-ı sarfları olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 26 sene 1197 Şühûdü’l-hâl: Müezzin Molla Mustafa b. Ahmed, Musa Ağa b. Mustafa, Ebûbekir b. Bektaş bölükbaşı, Süleyman Ağa b. Mehmed, Hüseyin Usta b. Mehmed, Molla Ali b. Halil, Salih b. Halil.