Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 360 Hüküm no: 387 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Makrihora köyünde ölen Vasil v. Mihal’in tasarrufunda olan evin vârisi Tohari v. Kostandi’ye kaldığı İstihbâr-ı menzil vekâleten Havâss-ı Refî‘a kazâsına muzâfe Makrihora nâm karyede mütemekkin iken bundan akdem hâlik olan Vasil v. Mihal nâm zimmînin li-ebeveyn kız karındaşı oğlu ve hasran vârisi işbu bâ‘isü’r-rakīm Tohari v. Kostandi nâm zimmî tarafından ber-vech-i âtî vekîl olduğu Musa Ağa b. Mustafa ve Mustafa b. Ahmed nâm kimesneler şehâdetleriyle şer‘an sâbite ve şahsı şâhidân-ı merkūmân ta‘rîfleriyle mu‘arrefe olan Dokni bt. Todori nâm Nasrâniye meclis-i şer‘-i hatîr-i lâzımü’t-tevkīrde bi’l-vekâle takrîr-i kelâm ve bast-ı merâm edip karye-i mezbûrede vâki‘ iki tarafdan Yanaki zimmî menzili ve bir tarafdan Molla İbrahim dükkânı ve bir tarafdan tarîk-i âm ile mahdûd bir bâb fevkānî oda ve dehliz ve tahtapûş ve tahtında ahur ve havluyu müştemil bir bâb menzili müvekkilim merkūm Tohari zimmînin mûrisi Vasil zimmînin ile’l-helâk bâ-hüccet-i şer‘iye şirâen yedinde mülk ve hakkı olup ba‘de helâkihî menzil-i mahdûd-ı mezkûr müvekkilim merkūma mevrûs olmağın lâkin menzil-i mahdûd-ı mezkûr ber-vech-i muharrer müvekkilim merkūm Tohari zimmînin mülk-i mevrûsu olduğunu müş‘ir yedinde hücceti olmamağla takrîri vukūf-ı tammı olan bî-garaz kimesnelerden suâl ve istihbâr ve haberleri zabt ve tahrîr ve hüccet olunup müvekkilim merkūm Tohari zimmîye i‘tâ olunmak bi’l-vekâle matlûbumdur dedikde hakīkat mukırre-i vekîl mersûme Dokni Nasrâniyenin bâlâda bast ü beyân ve şerh ü ayân eylediği minvâl üzere olduğunu karye-i mezbûre ahâlisinden Pehlivan Mehmed Beşe b. Ahmed ve Bostânî Ebûbekir bölükbaşı Emin Bektaş nâm kimesneler meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 25 min-şehri Rebî‘ülâhir sene 1197 Şâhidûn-ı sâbıkūn.