Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 361 Hüküm no: 388 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tohari v. Kostandi’nin Makrihora köyündeki evini Kozma v. Hıristo’ya sattığı Mübâya‘a Mahmiye-i İslâmbol’da ( ) mahallesinde mütemekkin Tohari v. Kostandi nâm zimmî tarafından husûs-ı âti’l-beyânda vekîl olduğu Musa Ağa b. Mustafa ve Molla Mustafa b. Ahmed nâm kimesneler şehâdetleriyle şer‘an sâbit olan Dokni bt. Todori nâm Nasrâniyenin şahsı ba‘de’t-ta‘rîfi’ş-şer‘î meclis-i şer‘-i hatîr-i lâzımü’t-tevkīrde işbu hâmilü’r-rakīm Kozma v. Hıristo zimmî muvâcehesinde bi’l-vekâle ikrâr-ı tam ve takrîr-i kelâm edip akd-i âti’z-zikrin sudûruna değin müvekkilim Tohari zimmînin bâ-hüccet-i şer‘iye irsen yedinde mülk ve hakkı olup Havâss-ı Refî‘a kazâsına muzâfe Makrihora nâm karyede vâki‘ iki tarafdan Yanaki zimmî mülkü ve bir tarafdan Molla İbrahim dükkânı ve bir tarafdan tarîk-i âm ile mahdûd bir bâb fevkānî oda ve dehliz ve tahtapûş ve tahtında ahur ve bir mikdâr havluyu muhtevî bir bâb mülk menzilini cümle-i tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Kozma zimmîye yüz otuz yedi buçuk guruşa bi’l-vekâle bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz otuz yedi buçuk guruşu merkūm Kozma zimmî yedinden bi’l-vekâle tamamen ahz ü kabz eyledim, ba‘de’l-yevm menzil-i mahdûd-ı mezkûr merkūm Kozma zimmînin mülk-i müşterâsı ve hakk-ı sarfı olup müvekkilim merkūm Tohari zimmînin kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî 26 min-şehri Rebî‘ülâhır sene 1197 Şâhidûn-ı sâbıkūn.