Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 362 Hüküm no: 389 Orijinal metin no: [56a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Çelebi mahallesinden Fatma bt. Musa’nın oğlu Mustafa Ağa’ya bağ ve evini sattığı, bostan yerini de meccanen ferağ ettiği Emlâk mübâya‘ası Mahmiye-i İslâmbol’da Sulu Manastır kurbünde Abdi Çelebi mahallesinde sâkine Fatıma bt. Musa nâm hatun tarafından husûs-ı âti’l-beyânı ikrâra vekîl olduğu zâtını ârifân Ahmed Ağa b. Mustafa ve es-Seyyid Ömer Ağa b. ( ) nâm kimesneler şehâdetleriyle şer‘an sâbit olan Mehmed Yazıcı b. Abdullah nâm kimesne meclis-i şer‘-i şerîf-i enverde müvekkile-i mezbûrenin sadrî kebîr oğlu işbu bâ‘isü’l-kitâb Mustafa Ağa b. el-Hâc Mehmed nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûrenin irsen yedinde mülk ve hakkı olup medîne-i Üsküdar’a tâbi‘ Kādı karyesinde kâin Çarıklı mahallesinde vâki‘ bir tarafdan Emine Hatun menzili ve bir tarafdan Kasab Ahmed menzili ve iki tarafdan tarîk-i âm ile mahdûd fevkānî iki bâb oda ve sofa ve kenîf ve âbdesthâne ve tahtânî bir oda ve bir matbah ve kenîf ve kömürlük ve bir mikdâr havluyu müştemil bir bâb mülk menzil ile karye-i mezbûrede kefere maşadlığı nâm mahâlde kâin bir tarafdan mezbûre Emine Hatun bağı ve bir tarafdan Papazoğlu bağçesi ve bir tarafdan tarîk-i âm ile mahdûd müsellesü’ş-şekl kürûmî mülk on iki dönüm mikdârı bir kıt‘a bağ ve yine karye-i mezbûrede vâki‘ Kızıltoprak [nâm] mahâlde kâin iki tarafdan mezbûre Emine Hatun bağı ve bir tarafdan Köle Abdullah bağı ve bir tarafdan zikri âtî bostan yeri ile mahdûd birbirine muttasıl altışar dönümden on iki dönüm mikdârı kürûmî mülk iki kıt‘a bağla cem‘an üç kıt‘a bağını tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile oğlu mezbûr Mustafa Ağa’ya beş yüz on guruşa bey‘ ve temlik ve teslîm ve yine karye-i mezbûrede vâki‘ lede’l-ahâli ve’l-cîrân ma‘lûmü’l-hudûd Sultan Selim Vakfı’na senevî seksen akçe mukāta‘alı sekiz dönüm bostan yerini dahi bâ-ma‘rifet-i mütevellî oğlu mezbûr Mustafa Ağa’ya meccânen ferâğ ve tefvîz eylediğinde ol dahi ber-vech-i muharrer iştirâ ve temellük ve tesellüm ve tefevvüz [56b] ve kabûl eyledikden sonra semen-i mezkûr beş yüz on guruş mutâlebesinden müvekkilem mezbûre Fatıma Hatun oğlu mezbûr Mustafa Ağa’nın zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm zikr olunan menzil ve bağlar mezbûr Mustafa Ağa’nın mülk-i müşterâsı ve zikr olunan bostan yeri dahi dâhil-i havza-i tasarrufu olup müvekkilim mezbûre Fatıma Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 28 min-şehri Rebî‘ülâhir sene 1197 Şühûdü’l-hâl: Molla Mehmed Emin b. Ali, Sîmkeş Eyüb Ağa b. Ahmed, Fırıncı Halil Beşe b. Abdullah, Ahmed Ağa b. Mustafa, Gürcü Hasan Beşe b. ( ), es-Seyyid Ömer Ağa b. ( ), Molla Ali b. Halil.