Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 218 Hüküm no: 231 Orijinal metin no: [34b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîrî Paşa Vakfı’na ait bostanın kullanım hakkının Nikola v. İstati’ye devredilmesi [Mahmiye-i] Kostantıniyye -humiyet ani’l-âfât ve’l-beliyye- mahallâtından merhûm Mustafa Paşa kurbunda Çingene mahallesi sâkinelerinden (...) bt. Dimitri nâm nasrâniye meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Nikola v. İstati nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Yâvedûd mahallesi kurbunda vâki‘ merhûm Pîrî Paşa vakfından olup bir tarafdan yine merhûm-ı mezbûr Pîrî Paşa bostanına ve bir tarafdan tarîk-i hâssa ve iki tarafdan tarîk-i âma müntehî beher sene altı yüz akçe mukāta‘alı mutasarrıfe olduğum bir kıt‘a bostanın hakk-ı tasarrufunu vakf-ı mezbûr mütevellîsi ma‘rifetiyle mezbûr Nikola’ya tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan altı bin nakd-i fıddî-i Osmânî râyic fi’l-vakt akçeyi mezbûr Nikola yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân hudûd ile mahdûd olan bostan mezbûr Nikola’nındır sâir emsâli tasarrufu gibi keyfe mâ yeşâ ve hasbe mâ yürîd mutasarrıf olsun dedikde mukırra-i mezbûrenin vech-i mübeyyen üzre cârî olan ikrâr ve takrîrin el-mukarru lehü’l-mezbûr Nikola bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî aşer min Cumâdelûlâ li târihi’l-mezbûr. Şuhûdü’l-hâl: Mehmed Bey b. Abdullah el-Bostanî, Kara Ali b. Abdullah el-Bostanî, Süleyman b. Turgud, Mustafa b. Mehmed, Yanaki el-Bostanî, Yorgi v. Dimo ve gayruhüm mine’l-[hâzırîn.]