Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 220 Hüküm no: 234 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Nikola’nın tarlalarının kullanım hakkını Yani v. İstati’ye devretmesi Vilâyet-i Rumeli’nde [Mora] sancağında Kalavrita kazâsına tâbi‘ Sopotoz nâm karyeden Todori v. Nikola nâm zimmî meclis-i şer‘-i şerîf-i lâzımü’t-teşrîfde işbu râfi‘ü hâze’l-kitâb Yani v. İstati nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme sınırında mevâzi‘-i adîdede vâki‘ bir kıt‘ası Yani [v.] Pota tarlası demekle ma‘rûf ve bir kıt‘ası Dimo [v.] Karaman tarlası ve bir kıt‘a Yani [v.] Galova tarlası ve bir kıt‘ası Kosta [v.] Ankorya tarlası ve bir kıt‘ası Rıdvan nâm kimesneden müfevvez ettiğim tarla ve bir kıt‘ası Pendazi tarlası ve bir tarafdan Makro tarlası demekle ma‘rûf ve bir kıt‘ası Ormanlık tarlası demekle ma‘rûf cem‘an yedi kıt‘a tarla ki tahmînen cümlesi on beş şinik tohum istî‘âb eder mutasarrıf olduğum tarlaların hakk-ı tasarruflarını sâhib-i arz ma‘rifetiyle mezbûra tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde sekiz bin nakd-i fıddî-i Osmânî râyic fi’l-vakt akçeyi mezbûr Yani yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân yedi kıt‘a bi hakkın tasarrufumda olan tarlaların hakk-ı tasarrufları mersûmundur sâir emsâli tasarrufu gibi keyfe mâ yeşâ mutasarrıf olsun dedikde gıbbe’t-tasdîk ketb olundu. Hurrire fi’t-târihi’l-mezbûr. Şuhûdü’l-hâl: Mustafa Beşe b. Abdullah er-Râcil, Hüseyin Beşe b. Abdullah er-Râcil, Mustafa b. Mehmed, Ali b. Abdullah, Süleyman b. Turgud, Yakub b. Kurd, Yorgi [v.] Anastas ve gayruhüm mine’l-hâzırîn.