Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 223 Hüküm no: 238 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâbil b. Safa’nın menzilini Mehmed b. Ahmed’e satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Baba Haydar mahallesi sâkinlerinden Kābil b. Safa nâm kimesne meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb hâssa suyolcuları zümresinden Mehmed b. Ahmed nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mahalle-i merkūmede vâki‘ bir tarafdan el-Hâc Hasan b. Musa mülküne ve bir tarafdan Ayşe Hâtun vakfı’na ve bir tarafdan Ali ve Maden mülküne ve bir tarafdan Dilârâm bt. Abdullah mülküne ve bir tarafdan tarîk-i âma müntehî ve mahdûd bir fevkānî beyti ve bir tahtânî beyti ve kenîfi ve zât-ı eşcâr-ı müsmire ve gayr-ı müsmireyi hâvî hadîkayı müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin merkūm Mehmed’e on sekiz bin yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm sâlifü’l-beyân hudûd ile mahdûd olan menzil-i merkūm Mehmed’in mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Mehmed vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min Cumâdelâhire li sene tis‘a ve ışrîn ba‘de’l-elf. Şuhûdü’l-hâl: İlmüddin Efendi b. Süleyman el-İmâm, Mehmed Halîfe b. Ferruh el-Müezzin, Ali Ağa b. Abdülmennân, Ahmed Çelebi b. ( ) el-Cündî Mustafa b. Abdullah, Veli b. Musa, el-Hâc Hasan b. Musa, Veli Reis b. Mustafa, Mehmed b. Ahmed, Receb b. Abdullah, Mustafa b. Mehmed, Perviz b. Abdullah ve gayruhüm mine’l-hâzırîn.