Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 228 Hüküm no: 245 Orijinal metin no: [36b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Nikola’nın değirmen hissesini Panayot v. Aleksi’ye satması Vilâyet-i Rumeli’nde Mora sancağında Kalavrita kazâsına tâbi‘ Sopotoz nâm karyeden Todori v. Nikola nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Panayot v. Aleksi nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ Deresuyu demekle ma‘rûf nehirde dâir bir göz mülk değirmenden beher mâh yedi gün olan hisse-i şâyi‘amı cümle-i tevâbi‘ ve levâhıkı ve kâffe-i menâfi‘ ve levâhıkı ve kâffe-i menâfi‘ ve merâfıkı ile mezbûr Panayot’a dört bin nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân değirmenden beher mâh yedi gün olan hisse-i şâyi‘am mezbûr Panayot’un mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Panayot vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis aşer min Cumâdelâhire li sene tis‘a ve ışrîn ba‘de’l-elf. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, Ahmed b. Abdullah ve gayruhüm mine’l-hâzırîn.