Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 233 Hüküm no: 253 Orijinal metin no: [38a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maskalyo v. Franko ve kardeşi Kamino’nun bir adet bağlarını Nikola v. Lolo’ya satmaları Vilâyet-i Rumeli’nde İnebahtı sancağında Gerbeniş kazâsına tâbi‘ Korişegi nâm karye sâkinlerinden Maskalyo v. Franko nâm zimmî kendi tarafından asâleten ve li ebeveyn karındaşı Kamino nâm zimmî tarafından husûs-ı âti’l-beyâna vekîl olup vekâleti hasm-ı şer‘î-i câhid mahzarında Kiryazi v. Franko ve Yani v. Yorgi nâm zimmîler şehâdetleri ile şer‘an sâbite ve mütehakkika oldukdan sonra vekâleten meclis-i şer‘-i şerîfde işbu hâmil-i hâze’l-kitâb Nikola v. Lolo nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre bağları dâhilinde vâki‘ bir tarafdan Franko v. ( ) bağına ve bir tarafdan Dimo v. Karoli bağına ve bir tarafdan Dimo v. Luka bağına ve bir tarafdan vâdiye müntehî bir kıt‘a mülk bağımızı cümle-i tevâbi‘ ve levâhıkı ile mezbûr Nikola’ya iki bin yüz elli nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ-ı mahdûd-ı mezkûr Nikola’nın mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûr Maskalyo’nun bi’l-asâle ve’l-vekâle cârî olan ikrâr ve takrîrini el-mukarru lehü’l-mezbûr Nikola vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis aşer min Cumâdelâhire li seneti tis‘a ve ışrîn ve elf. Şuhûdü’l-hâl: Ali b. Abdullah, Mustafa b. Mehmed, Ali Beşe b. Abdullah er-Râcil, Yakub b. Kurd, Kiryazi v. Franko, Mitro v. Kasbar, Minho v. Dimo, Tanaş v. ( ).