Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 318 Hüküm no: 385 Orijinal metin no: [59b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Dimo’nun tarla tasarruf hakkını Kondi v. Todori’ye satması Vilâyet-i Rumeli’nde Büyük Delvine kazâsına tâbi‘ Komaniçe nâm karye sâkinlerinden Kosta v. Dimo nâm zimmî meclis-i şer‘-i hatîrde işbu bâ‘isü’l-kitâb Kondi v. Todori nâm zimmî mahzarında bi’t-tav‘ ikrâr ve takrîr-i kelâm edip karye-i merkūme sınırı dâhilinde vâki‘ bir tarafdan Yani v. Nikola tarlasına ve bir tarafdan İspiro v. İstamo tarlasına ve bir tarafdan Yorgi v. Zaharka tarlasına ve bir tarafdan vâdiye müntehî ve mahdûd tahmînen diyârımız keyli ile iki keyl tohum istî‘âb eder bir kıt‘a mutasarrıf olduğum tarlanın içinde olan eşcârı ile hakk-ı tasarrufunu sâhib-i arz ma‘rifetiyle merkūm Kondi’ye tefvîz edip mukābele-i tefvîzde yedinden bin yüz nakid fıddî akçeyi merkūm Kondi yedinden ahz eyledim ba‘de’l-yevm sâlifü’l-beyân tarlanın hakk-ı tasarrufu merkūmundur dedikde mukırr-ı mezbûrun ikrâr ve takrîrini el-mukarru lehü’l-mezbûr Kondi vicâhen tasdîk ve şifâhen tahkīk edicek mâ hüve’l-vâki‘ ketb olundu. Hurrire fi’l-yevmi’l-hâmis aşer min Receb li târihi’l-mezbûr. Şuhûdü’l-hâl: Kiro v. Papa, Todori v. Kiryaki, Göme v. Andriye, Sano v. Morni, Yani v. Nika, Yani v. Lefteri ve gayruhüm mine’l-hâzırîn.