Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 331 Hüküm no: 407 Orijinal metin no: [73a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Martini’nin Delvine kazâsındaki ev ve bağını Kiro v. Köni’ye satması Vilâyet-i Rumeli’nde Delvine kazâsına tâbi‘ Muzine nâm karye sâkinlerinden Kiro v. Martini nâm zimmî meclis-i şer‘de hâmilü’l-kitâb Kiro v. Köni nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Martiyan v. ( ) mülküne ve bir tarafdan Doşo v. Kiro mülküne ve bir tarafdan vâdiye ve bir tarafdan tarîk-i âma müntehî bir tahtânî beyti ve sofayı ve bir mikdâr bostan yerini ve zât-ı eşcâr-ı müsmireyi hâvî mülk menzilimi ve yine karye-i merkūme bağları sınırında vâki‘ her biri inde ahâliyi’d-diyâr ma‘lûmü’l-hudûd ve’l-mikdâr iki kıt‘a mülk bağımı dahi cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin mezbûr Kiro’ya yirmi bin nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘ât-ı mezkûreyi mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ler mezkûr Kiro’nun mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Kiro tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer min Recebi’l-ferd li sene tis‘a ve ışrîn ve elf. Şuhûdü’l-hâl: es-Sâbıkūn.