Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 375 Hüküm no: 481 Orijinal metin no: [83a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal v. Yorgi’nin ev ve bağ hisselerini kardeşi Nikola’ya satıp tarlalarının da tasarruf hakkını devrettiği Vilâyet-i Rumeli’nde İnebahtı sancağında Gerbeniş kazâsına tâbi‘ Kalazmen nâm karye sâkinlerinden Mihal v. Yorgi nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb li ebeveyn karındaşı Nikola nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Yorgi v. Yani mülküne ve bir tarafdan Papa Mihal mülküne ve bir tarafdan vâdiye ve bir tarafdan tarîk-i âma müntehî ve mahdûd bir tahtânî beyti ve zât-ı eşcâr-ı müsmire ve gayr-ı müsmireyi hâvî bostan yerini müştemil olan menzilden nısf hisse-i şâyi‘amı ve yine karye-i merkūme kurbunda Varişteya nâm mevzi‘de vâki‘ lede’l-ahâlî ma‘lûmü’l-hudûd bir kıt‘a mülk bağdan nısf hisse-i şâyi‘amı bi safkatin vâhidetin karındaşım mezbûr Nikola’ya üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ân-ı mezkûrânı mahallinde kabza müşterî-i merkūmu taslît eylediğimden sonra yine karye-i merkūme sınırı dâhilinde mevâzi‘-i adîdede vâki‘ her biri lede’l-ahâlî ma‘lûmü’l-hudûd on kıt‘a tarlalardan dahi mutasarrıf olduğum nısf hisse-i şâyi‘alarımın hakk-ı tasarrufunu sâhib-i arz ma‘rifetiyle merkūm Nikola’ya tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan iki bin nakd-i mezbûrü’n-na‘t akçeyi merkūm Nikola yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzilden ve bağdan nısf hisse-i şâyi‘alar merkūm Nikola’nın mülk-i müşterâsıdır ve mârrü’z-zikr tarlalardan dahi mutasarrıf olduğum nısf hisse-i şâyi‘alarımın hakk-ı tasarrufu merkūmundur, keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Nikola bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-âşir li târihi’l-mezbûr. Şuhûdü’l-hâl: Dimo v. Mihal, Andriye v. Dimitri, Yani v. ( ) Şerbetçi, Yorgi v. Dimitri ve gayruhüm mine’l-hâzırîn.