Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 376 Hüküm no: 482 Orijinal metin no: [83a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Ali’nin sattığı evin babasından miras kaldığı (bey‘ bi’l-vefâ) Bi’l-fi‘l Şâhin Hâtun vakfı’na mütevellî olan fahrü’l-akrân Rıdvan Bey b. Ali tarafından husûs-ı âti’l-beyâna vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’l-mer‘î şer‘an sâbite olan vakf-ı mezbûr nâzırı Abdurrahman Halîfe b. Ömer nâm kimesne meclis-i şer‘-i hatîr-i lâzımü’t-tevkīrde medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Baba Haydar mahallesi sâkinlerinden Ahmed Beşe b. Ali nâm râcili ihzâr ve mahzarında bi’l-vekâle takrîr-i kelâm edip bundan akdem mezbûr Ahmed Beşe müvekkilim mezbûr Rıdvan Bey yedinden mâl-ı vakıfdan yedi bin nakd-i fıddî-i Osmânî râyic fi’l-vakt akçe alıp mahalle-i mezbûrede vâki‘ bir tarafdan fahrü’l-meşâyihîn Sivasî Efendi mülküne ve bir tarafdan fahrü’l-müderrisîn Arabzâde Mehmed Efendi mülküne ve bir tarafdan Perihan Hâtun vakfı’na ve bir tarafdan tarîk-i âma müntehî muhavvataynı müştemil olup muhavvata-i dâhiliyyesi iki bâb fevkānî beyti ve odayı ve sofayı ve ıstablı ve bi’r-i mâyı ve kenîfi müştemil olup muhavvata-i hâriciyyesi bir bâb fevkānî beyti ve odayı ve sofayı ve ıstablı ve bahçeyi ve kenîfi müştemil olan menzilini meblağ-ı mezbûra alâ tarîki’l-istiğlâl bey‘ eylemiş idi menzil-i mezbûrun mülknâmesi merkūm Ahmed Beşe yedinde bulunmamağla menzil-i mezbûr merkūm Ahmed Beşe’nin mülkü olduğu müvekkilim mezbûrun ma‘lûmu olmamağın meblağ-ı mezbûr merkūmdan tahlîs olunması müvekkilim mezbûrun matlûbudur dedikde gıbbe’s-suâl mezbûr Ahmed Beşe feth-i makāl edip cevâbında menzil-i mezbûr babam müteveffâ-yı mezbûr Ali’den bana irs-i şer‘le intikāl etmişdir husûs-ı mezbûr ahâlî-i mahalleden suâl olunsun dedikde udûl-i müslimînden Fethullah Bey b. Hüsrev nâm bevvâb-ı sultânî ve el-Hâc Mehmed Beşe b. Abdullah nâm râcil [83b] ve Veli b. Mustafa ve Mehmed Çavuş b. Kasım Ağa nâm kimesneler meclis-i şer‘a hâzırûn olup gıbbe’l-istihbâr fi’l-vâki‘ sâlifü’l-beyân hudûd ile mahdûd olan menzil-i mezbûr merkūm Ahmed Beşe’ye babası müteveffâ-yı mezbûr Ali’den bi hasebi’l-irsi’ş-şer‘î intikāl etmiş mülk-i mevrûsu olduğu bizim ma‘lûmumuzdur deyû alâ tarîki’ş-şehâde haber verdikleri gıbbe’t-taleb mâ hüve’l-vâki‘ hıfzan li’l-makāl ketb olunup yed-i tâlibe def‘ ve vaz‘ olundu. Hurrire fî evâsıtı Ramazâni’l-mübârek li sene tis‘a ve ışrîn ve elf. Şuhûdü’l-hâl: Hasan Efendi b. Hasan el-Müderris, Mehmed b. Abdurrahman, Mehmed Halîfe b. Hayreddin el-İmâm, Mehmed Çavuş b. Kasım, Ahmed Çelebi b. Hasan es-Sarrâcü’s-sultânî, Hâce Mehmed Efendi b. Hemdem el-İmâm, el-Hâc Ahmed Çelebi b. İbrahim, Mehmed Halîfe b. Hayreddin el-İmâm, Perviz b. Abdullah ve gayruhüm.