Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 377 Hüküm no: 483 Orijinal metin no: [83b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüstem b. Ahmed’in tarlasının tasarruf hakkını Marko v. Milo’ya devretmesi Vilâyet-i Rumeli’nde Avlonya sancağında Premedi kazâsına tâbi‘ Ragoriç nâm karye sâkinlerinden Rüstem b. Ahmed nâm acemî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Marko v. Milo nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ bir tarafdan Kirko v. Niko tarlasına ve bir tarafdan Kirko v. Kirido tarlasına ve bir tarafdan Piro v. Kiko tarlasına ve bir tarafdan Pano v. Kika tarlasına müntehî tahmînen diyârımız keyli ile iki keyl tohum istî‘âb eder mutasarrıf olduğum bir kıt‘a tarlanın hakk-ı tasarrufunu sâhib-i arz ma‘rifetiyle merkūm Marko’ya tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan yedi yüz nakd-i fıddî-i Osmânî râyic fi’l-vakt akçeyi merkūm Marko yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân bir kıt‘a tarlanın hakk-ı tasarrufu merkūm Marko’nundur sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Marko vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire fî 13 min Şevvâli’l-mükerrem sene 1029. Şuhûdü’l-hâl: Süleyman b. Kasım, Cafer b. İlyas, Ali b. Ahmed, Ali b. Abdullah el-Muhzır, Mustafa b. Mehmed el-Muhzır.