Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 378 Hüküm no: 484 Orijinal metin no: [83b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Hâce b. Menteş’in varislerinin kendilerine miras kalan değirmeni Abdurrahman Efendi b. Abdullah’a sattığı Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Kızıl Mescid mahallesi sâkinlerinden iken bundan akdem vefât eden Hasan Hâce b. Menteş nâm kimesnenin verâseti, li ebeveyn karındaşı Mehmed nâm kimesneye ve sulbî kebîr kızları Selime ve Râbia ve Fâtıma nâm hâtunlara münhasıra oldukdan sonra mezbûrûn taraflarından bey‘-i âti’l-beyânı ikrâra vekîl olup vekâleti hasm-ı şer‘î-i câhid mahzarında Mustafa Halîfe b. Receb ve Ömer Halîfe b. Seyfullah nâm kimesneler şehâdetleri ile şer‘an sâbite olan fahrü’l-a‘yân Ali Ağa b. Abdülmennân nâm kimesne meclis-i şer‘de işbu hâmil-i hâze’l-kitâb Abdurrahman Efendi b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilelerim mezbûrelere müteveffâ-yı mezbûr Hasan Hâce’den kendilere bi hasebi’l-irsi’ş-şer‘î intikāl eden vilâyet-i Anadolu’da Kinolu kazâsına tâbi‘ Kaymazlar nâm karye kurbunda Kömle demekle ma‘rûf mevzi‘de vâki‘ bir göz mülk değirmeni mezbûr Abdurrahman Efendi’ye iki bin nakid akçeye bey‘-i bât ile bey‘ ve kabz-ı semen edip mebî‘-i mezbûreyi mahallinde kabza müşterî-i merkūmu taslît eylediler ba‘de’l-yevm sâlifü’l-beyân değirmen merkūm Abdurrahman Efendi’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun bi’l-vekâle cârî olan ikrârını el-mukarru lehü’l-mezbûr Abdurrahman Efendi tasdîk edicek kayd olundu. Hurrire fi’t-târihi’l-mezbûr. Şuhûdü’l-hâl: Osman b. Hamza, el-Hâc Mustafa b. Sevindik el-Müezzin, Halil b. Hamza, Mehmed b. Mehmed, Veli Halîfe b. İshak, Ali b. Korkud, el-Hâc Muslihiddin b. Veli, Mustafa Halîfe b. Receb, Ömer Halîfe b. Seyfullah ve gayruhüm.