Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 378 Hüküm no: 485 Orijinal metin no: [83b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Musa b. Atâullah’ın Perviz Efendi ve Mustafa Çelebi vakıflarına olan borcunun alacağıyla takas edilmesi Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Çavuş Kasım mahallesi sâkinlerinden Şeyh Musa b. Atâullah nâm kimesne meclis-i şer‘-i hatîr-i lâzımü’t-tevkīrde Perviz Efendi vakfı’na ve Mustafa Çelebi vakfı’na mütevellî olan hâmil-i hâze’l-kitâb el-Hâc Receb b. Yunus mahzarında bi’t-tav‘ ve’r-rızâ ikrâr ve takrîr-i kelâm edip müşârün-ileyh Perviz Efendi vakfı’ndan bin akçe ve mûmâ-ileyh Mustafa Çavuş vakfı’ndan yedi yüz akçe zimmetimde lâzımü’l-edâ ve vâcibü’l-kazâ deynim olup ve târih-i kitâbdan sene tamâmına dek müeccel beynimizde cinsi ve levni ilm-i şer‘î ile ma‘lûm çuka bahâsından iki yüz akçe deynim olup Âsım Ahmed Çelebi vakfı’ndan bir senede dokuz yüz akçe vazîfemi ve Mustafa Çelebi vakfı’ndan bin akçe vazîfemi mütevellî-i mezbûr ba‘de hulûli’s-sene meblağ-ı mezbûr mukābelesinde ahz ve kabz eylesin dedikde mukırr-ı mezbûrun ikrârını el-mukarru lehü’l-mezbûr el-Hâc Receb vicâhen ve şifâhen tasdîk ve tahkīk edicek gıbbe’t-taleb ketb olundu. Hurrire fi’l-yevmi’s-sânî aşer min Şevvâli’l-mükerrem li târihi’l-mezbûr. Şuhûdü’l-hâl: Abdurrahman Halîfe b. Ömer el-İmâm, Ahmed Çelebi b. İbrahim el-Kâtib, Hasan Efendi b. Şaban, Murtaza Halîfe b. Mehmed, Veli Halîfe b. Abdullah, Perviz b. Abdullah, Mustafa b. Mehmed.