Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 379 Hüküm no: 486 Orijinal metin no: [84a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Deriçe v. Dado’nun tarlalarının tasarruf hakkını Ergirikasrı Vaniste köylülerine devrettiği Vilâyet-i Rumeli’nde Avlonya sancağında Ergirikasrı kazâsına tâbi‘ Vaniste nâm karye sâkinlerinden Deriçe v. Dado nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb yine karye-i merkūme sâkinlerinden Niko v. Dimo ve Mojaki v. Yani ve Mino v. Nika ve Varno v. Yani ve Yorgo v. Yani ve Panko v. Varno ve Duka v. Savi nâm zimmîler mahzarlarında bi’t-tav‘ ve’r-rızâ ikrâr ve takrîr-i kelâm edip karye-i merkūme sınırı dâhilinde vâki‘ eşcâr-ı müsmire ve gayr-ı müsmiresi olan bir kıt‘a ve yine karye-i merkūme kurbunda Mişnosi nâm mevzi‘de vâki‘ bir kıt‘a ve Beylikçayır kurbunda vâki‘ bir kıt‘a cem‘an mutasarrıf olduğum üç kıt‘a tarlaların hakk-ı tasarrufunu sâhib-i arz ma‘rifetiyle merkūmûna tefvîz edip anlar dahi minvâl-i muharrer üzre tefevvüz ve kabûl eylediklerinden sonra mukābele-i tefvîzde olan altı bin üç yüz nakd-i fıddî-i Osmânî râyic fi’l-vakt akçeyi merkūmûn yedlerinden ale’l-iştirâki’s-seviy ahz ve kabz eyledim ba‘de’l-yevm sâlifü’l-beyân tarlaların hakk-ı tasarrufu merkūmûnundur keyfe mâ yeşâûn ve yahtârûn mutasarrıf olsunlar dediklerinde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehümü’l-mezbûrûn bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâdis min Şevvâli’l-mükerrem li târihi’l-mezbûr. Şuhûdü’l-hâl: Varto v. Kiso, Duka v. Yorgo, Yani v. Yorgi, Yani v. Hamo ve gayruhüm mine’l-hâzırîn.