Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 380 Hüküm no: 487 Orijinal metin no: [84a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasil ve Armağan’ın babaları Ergiri’den kalan miras haklarını kardeşleri Paroş’a satmaları Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Kerasa nâm karye sâkinlerinden Vasil ve Armağan v. Ergiri nâm zimmîler meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb li ebeveyn karındaşı Paroş nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip işbu akdin sudûruna dek babamız hâlik-i mezbûr Ergiri’den ale’l-iştirâki’s-seviy bize intikāl eden karye-i merkūmede vâki‘ bir tarafdan Apostol v. Yorgi mülküne ve bir tarafdan İskarlet v. Dimo mülküne ve bir tarafdan Yani v. Dimo mülküne ve bir tarafdan yine müşterî-i mezbûr mülküne müntehî ve mahdûd olan bir fevkānî beyti müştemil olan mülk menzilimizi ve beynimizde ilm-i şer‘î ile ma‘lûm beyti ve yine karye-i merkūme kurbunda vâki‘ lede’l-ahâlî ma‘lûmü’l-hudûd bir kıt‘a mülk çayırı ve yine karye-i merkūmede vâki‘ bir göz mülk su değirmeninden bize intikāl eden hisse-i şâyi‘amızı cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin karındaşımız merkūm Paroş’a bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eyledik ba‘de’l-yevm sâlifü’l-beyân mebî‘ler merkūm Paroş’un mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dediklerinde mukırrân-ı mezbûrânın minvâl-i muharrer üzre cârî olan ikrâr ve takrîrlerini el-mukarru lehü’l-mezbûr Paroş bi’l-muvâcehe tasdîk ve bi’l-müşâfehe tasdîk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sânî aşer min Şevvâli’l-mükerrem li târihi’l-mezbûr. Şuhûdü’l-hâl: Vasil v. Yani, İskalani v. İskarlet, Dimo v. Ergiri, Armağan v. Yani, Papa v. Apostol, Toroso v. Nikola, Anastaş v. Apostol, Paroş v. Apostol, Toros v. Apostol, Niko v. Pranko ve gayruhüm mine’l-hâzırîn.