Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 380 Hüküm no: 488 Orijinal metin no: [84a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Mihal’in ev, bağ ve bahçe ile tarla tasarruf hakkını Nikola v. Yorgi’ye devretmesi Delvine sancağında Aydonat kazâsına tâbi‘ Milot nâm karyeden Todori v. Mihal nâm zimmî mahfil-i kazâda işbu sâhibü’l-kitâb Nikola v. Yorgi muvâcehesinde bi’t-tav‘i’s-sâf ikrâr ve takrîr-i kelâm edip karye-i mezbûrede vâki‘ bir tarafdan Göne v. Nikola mülküne ve bir tarafdan Dimo v. Yorgi mülküne ve bir tarafdan Niko v. Zoriye mülküne ve bir tarafdan Niko v. Minho mülküne müntehî bir tahtânî beyti ve mahzeni müştemil mülk menzilimi ve yine menzil-i mezbûre muttasıl lede’l-ahâlî ma‘lûmü’l-hudûd bir kıt‘a mülk bahçemi ve yine karye-i merkūme bağları dâhilinde vâki‘ bir tarafdan Diyoftero v. Ayas bağına ve bir tarafdan Köni v. ( ) bağına ve bir tarafdan Yorgi v. ( ) bağına ve bir tarafdan tarîk-i âma müntehî iki dönüm bir kıt‘a mülk bağımı cümle-i tevâbi‘ ve levâhıkı ve âmme-i menâfi‘ ve merâfıkı ile bi safkatin vâhidetin mezbûr Nikola’ya iki bin dört yüz nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ân-ı mezkûrânı mahallinde kabza taslît eyledikden sonra karye-i mezbûr sınırı dâhilinde vâki‘ lede’l-ahâlî ma‘lûmü’l-hudûd diyârımız keyli ile tahmînen iki keyl tohum istî‘âb eder iki kıt‘a tarlanın hakk-ı tasarrufunu sâhib-i arz ma‘rifetiyle mezbûra tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîz olan üç yüz elli nakd-i mezbûrü’n-na‘t akçeye merkūm Nikola yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan emlâk-i mezbûr Nikola’nın mülk-i müşterâ-yı sarîhidir ve mârrü’z-zikr iki kıt‘a tarla dahi merkūmundur sâir emsâli tasarrufu gibi mutasarrıf olsun dedikde mukırr-ı mezbûru ikrâr-ı meşrûhunda mukarru lehü’l-mezbûr Nikola bi’l-muvâcehe tasdîk edicek hurrire fi’l-yevmi’l-hâmis aşer min Şevvâli’l-mükerrem li sene tis‘a ve ışrîn ve elf. Şuhûdü’l-hâl: Mustafa [b.] Mehmed, Yakub [b.] Kurd, Ali b. Abdullah, Yusuf b. Abdullah, Nikola [v.] Yorgi, Donik [v.] Niko, Yani [v.] Pavlo, Kini [v.] Yani, Zako [v.] Dimo, Mihal [v.] Kini.