Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 382 Hüküm no: 490 Orijinal metin no: [84b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferhad v. Budak’ın Timurhan b. Ebülhayr’dan Çinili Çeşme sakalığını satın alması Medîne-i Ebâ Eyyûb-i Ensârî -râdiye anhu Rabbühü’l-Bârî- tevâbi‘inden Hasköy’de sâkin Ferhad v. Budak nâm Ermeni mahfil-i kazâda bâ‘isü’l-kitâb Timurhan b. Ebülhayr nâm kimesne mahzarında takrîr-i kelâm edip bundan akdem mezbûr Timurhan mahmiye-i Kostantıniyye -humiyet ani’l-âfât ve’l-beliyye-de vâki‘ Çinili Çeşme demekle ma‘rûf çeşme saka[sı] olup yerini ve kırbasını mukaddemâ bana üç bin yedi yüz akçeye bey‘ ve teslîm etmiş idi hâlâ mebî‘-i mezbûrun gāilesi olmağla merkūm Timurhan ile bey‘-i mezbûru rızâmız ile fesh edip meblağ-ı mezbûr üç bin yedi yüz akçeyi mesfûr Timurhan yedinden bi’t-tamâm ve’l-kemâl ahz ve kabz eyledim dedikde mukırr-ı mezbûrun vech-i mübeyyen üzre cârî olan ikrâr ve takrîrini mezbûr Timurhan bi’l-muvâcehe tasdîk edicek mâ hüve’l-vâki‘ [bi’t-taleb ketb olundu]. Fi’t-târihi’l-mezbûr. Şuhûdü’l-hâl: Ali b. Mehmed şeyh-i sakayân, Süleyman Bey b. Sadi el-Cündî Osman Beşe b. Abdullah er-Râcil, Mehmed Bey b. Hızır er-Râcil, Mustafa b. Mehmed ve gayruhüm mine’l-hâzırîn.