Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 382 Hüküm no: 491 Orijinal metin no: [84b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasef v. Yahud’un bâc-ı pâ-yı ağnâm iltizamını Abdullah’ın oğulları Mehmed Beşe ve Ali Beşe’ye satması Mahmiye-i Kostantıniyye -humiyet ani’l-âfât ve’l-beliyye- hısnı ebvâbından Edirnekapısı’nda ber vech-i iltizâm bâc-ı pâ-yı ağnâm olan Yasef v. Yahud nâm yahudi meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mehmed Beşe ve Ali Beşe ibney Abdullah nâm râciller mahzarlarında ikrâr ve takrîr-i kelâm edip Havâss-ı Aliyye kazâsı müzâfâtından taht-ı iltizâmımda dâhil Midye nâhiyesinde vâki‘ olan bâc-ı pâ-yı ağnâm târih-i kitâb Recebi’l-ferdi gurresinden sene tamâmına dek mezbûrân Mehmed Beşe ve Ali Beşe’ye ale’l-iştirâk beş bin nakd-i fıddî-i Osmânî râyic fi’l-vakt akçeye der-uhde edip meblağ-ı mezbûru merkūmân yedlerinden ale’l-iştirâk emânet-i mahkiyem hasebiyle bi’t-tamâm ve’l-kemâl ahz ve kabz eyledim dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehümâ’l-mezbûrân Mehmed Beşe ve Ali Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olunup yed-i tâlibe def‘ ve vaz‘ olundu. Hurrire fi’l-yevmi’s-sâmin aşer li târihi’l-[mezbûr]. Şuhûdü’l-hâl: Hasan Çelebi b. ( ) el-Yesârî, Aydın Beşe b. Abdullah er-Râcil, İbrahim Beşe b. Abdullah er-Râcil, Bâkī Çelebi b. Receb er-Râcil.